पुणे: लोहगाव-हरणतळे परिसरात बिबट्याची दहशत; घरात घुसून पाळीव कुत्र्याची शिकार केल्याचा थरार सीसीटीव्हीत कैद

पुणे: लोहगाव-हरणतळे परिसरात बिबट्याच्या वाढत्या वावरामुळे नागरिकांमध्ये भीतीचे वातावरण निर्माण झाले आहे. मध्यरात्री एका घराच्या आवारात घुसून बिबट्याने पाळीव श्वानाची शिकार केल्याची धक्कादायक घटना समोर आली असून, हा संपूर्ण प्रकार घरातील सीसीटीव्ही कॅमेऱ्यात कैद झाला आहे. या घटनेनंतर वनविभागाने घटनास्थळी पाहणी सुरू करत बिबट्याला पकडण्यासाठी पिंजरा लावण्याची प्रक्रिया सुरू केली आहे.

माहितीनुसार, हरणतळे परिसरात राहणारे यमराज अशोक खांदवे यांच्या घराच्या कंपाऊंडमध्ये पहाटे सुमारे दोनच्या सुमारास बिबट्याने पाच फूट उंच भिंतीवरून उडी मारत प्रवेश केला. घराच्या आवारातील पाळीव श्वानावर झडप घालत त्याला जबड्यात पकडून तो पुन्हा भिंतीवरून बाहेर निघून गेला. दुसऱ्या दिवशी सकाळी श्वान दिसत नसल्याने कुटुंबीयांनी सीसीटीव्ही फुटेज तपासले असता हा थरारक प्रकार उघड झाला.

घटनेनंतर घरापासून काहीशे मीटर अंतरावर श्वानाचा मृतदेह आढळून आला. लोकवस्तीच्या अगदी जवळ बिबट्याने वावर केल्यामुळे स्थानिक नागरिकांमध्ये भीतीचे वातावरण निर्माण झाले असून, लहान मुले आणि ज्येष्ठ नागरिकांच्या सुरक्षिततेबाबत चिंता व्यक्त केली जात आहे.
या घटनेची माहिती मिळताच आमदार बापूसाहेब पठारे यांनी वनविभागाच्या वरिष्ठ अधिकाऱ्यांशी संपर्क साधून तातडीने कारवाई करण्याची मागणी केली. परिसरात बिबट्याचा वावर सातत्याने असल्याच्या तक्रारी येत असतानाही यापूर्वी ठोस पुरावा नसल्याचे सांगण्यात आले होते. मात्र सीसीटीव्ही फुटेज समोर आल्यानंतर बिबट्याला पकडण्यासाठी तात्काळ पिंजरा लावण्याचे निर्देश देण्यात आले.

वनविभागाच्या पथकाने घटनास्थळी पाहणी सुरू केली असून बिबट्याच्या हालचालींचा मागोवा घेत योग्य ठिकाणी पिंजरा उभारण्याची तयारी सुरू आहे. तसेच बिबट्या पकडला जाईपर्यंत नागरिकांनी विशेषतः रात्रीच्या वेळी एकटे बाहेर पडणे टाळावे, लहान मुलांवर लक्ष ठेवावे आणि कोणत्याही संशयास्पद हालचाली दिसल्यास तात्काळ वनविभागाला माहिती द्यावी, असे आवाहन करण्यात आले आहे.

"आमचा पाळीव कुत्रा दिसत नसल्याने आम्ही सीसीटीव्ही फुटेज तपासले. त्यावेळी बिबट्याने घरात घुसून श्वानाला उचलून नेल्याचे दिसले. या घटनेमुळे परिसरातील नागरिकांमध्ये, विशेषतः लहान मुले आणि ज्येष्ठांमध्ये भीतीचे वातावरण निर्माण झाले आहे. यमराज अशोक खांदवे, रहिवासी, हरणतळे, लोहगाव'