दिव्यांग रिक्षाचालकाचा 'तो' शेवटचा प्रवास! पत्नीच्या प्रेमसंबंधाच्या संशयातून पतीने केला काटा; ३७ दिवसांनंतर खुनाचा गुंता सुटला!

 

बदायूं (उत्तर प्रदेश): अनैतिक संबंधांच्या संशयातून एका दिव्यांग व्यक्तीची निर्घृण हत्या केल्याची धक्कादायक घटना उत्तर प्रदेशातील बदायूं जिल्ह्यातून उघडकीस आली आहे. तब्बल ३७ दिवसांच्या तपासानंतर पोलिसांनी या प्रकरणाचा छडा लावून मुख्य आरोपीला बेड्या ठोकल्या आहेत.

काय आहे प्रकरण?
आंवला भागातील रहिवासी असलेला चंद्रप्रकाश हा एक दिव्यांग ई-रिक्षा चालक होता. ३० मार्च रोजी त्याचा मृतदेह सेंधी-ख्योराजपूर मार्गावरील एका गव्हाच्या शेतात आढळून आला होता. सुरुवातीला हा घातपात की आत्महत्या हे स्पष्ट नव्हते, मात्र चंद्रप्रकाशच्या वडिलांनी दिलेल्या तक्रारीवरून पोलिसांनी हत्येचा गुन्हा दाखल करून तपास सुरू केला.

असा लागला छडा:
पोलिसांनी केलेल्या तपासात धक्कादायक माहिती समोर आली. आरोपी सिंकू उर्फ मुकेश याला संशय होता की त्याची पत्नी शिवानी आणि चंद्रप्रकाश यांच्यात प्रेमसंबंध आहेत. याच रागातून सिंकूने हत्येचा कट रचला. घटनेच्या दिवशी सिंकूने चंद्रप्रकाशला विश्वासात घेऊन आपल्यासोबत एका शेतात नेले. तिथे त्याने चंद्रप्रकाशला जबरदस्तीने मोठ्या प्रमाणावर दारू पाजली.

दोघेही नशेत असताना सिंकूने त्याला आपल्या पत्नीशी असलेले संबंध तोडण्यास सांगितले, ज्यावरून त्यांच्यात वाद झाला. संतापलेल्या सिंकूने दोरीने चंद्रप्रकाशचा गळा आवळून त्याची हत्या केली आणि मृतदेह तिथेच टाकून तो फरार झाला.

३७ दिवसांचा पाठलाग:
हत्या केल्यानंतर सिंकूने चंद्रप्रकाशची ई-रिक्षा चोरली आणि तो बरेलीमार्गे दादरी येथे पळून गेला. पोलीस सतत त्याचा शोध घेत होते. अखेर गोपनीय माहितीच्या आधारे पोलिसांनी सापळा रचून सरदार नगर परिसरातून सिंकूला अटक केली. पोलिसांनी त्याच्याकडून चोरी केलेली ई-रिक्षाही जप्त केली आहे.