कोल्हापुर: सुर्वेनगरात मालमत्तेच्या वादातून तब्बल आठ जिलेटिन स्फोट; दोन खोल्या पूर्णपणे उद्ध्वस्त, परिसर हादरला

कोल्हापूर: कळंबा रिंगरोडजवळील सुर्वेनगरातील रणवरे कॉलनीत मंगळवारी सायंकाळी पावणे सातच्या सुमारास बंद बंगल्यात अज्ञातांनी जिलेटीनसदृश्य कांड्याचे आठ स्फोट घडवून आणल्याची घटना घडली. लागोपाठ झालेल्या या स्फोटात बंगल्यातील चार भिंती पूर्णपणे कोसळल्या असून बंगल्याशेजारील चार घरांचे मोठे नुकसान झाले आहे.दोन कुटुंबात बंगल्यावरुन असलेल्या वादातून हा स्फोट घडवला गेला असण्याची चर्चा असल्याने पोलिसांनी त्यादृष्टीने तपास सुरू केला आहे. या स्फोटाची तीव्रता इतकी प्रचंड होती की घराच्या मागील बाजूच्या दोन बेडरूमसह तीन भिंती पूर्णपणे जमीनदोस्त झाल्या.

प्राथमिक माहितीनुसार, हा प्रशस्त बंगला शशिकला वासुदेव बोळींजकर यांच्या मालकीचा असून एप्रिलमध्ये त्यांचे निधन झाले. त्यांच्या पश्चत दोन कुटुंबात बंगल्यावरुन न्यायालयीन वाद सुरू आहे. त्यामुळे सध्या या बंगल्यात कोणीच राहत नव्हते. मंगळवारी सायंकाळी अचानक या बंगल्यात सलग आठ स्फोट झाले. या स्फोटाचा आवाज जवळपास एक किलोमीटर अंतरापर्यंत ऐकू आला. स्फोटामुळे बंगल्याच्या पाठीमागील दोन खोल्यांच्या भिंती जमीनदोस्त झाल्या. तर अस्मिता बुरळे, जगन्नाथ पाटील, आर. डी. कुंभार आणि जिरगे यांच्या घरांचे नुकसान झाले.

घटनेची माहिती मिळताच करवीर, जुना राजवाडा पोलिस, अग्निशमन दल तातडीने घटनास्थळी दाखल झाले. पोलिसांनी रात्री उशिरापर्यंत स्फोटातील संशयितांचा शोध सुरू होता. घटनेनंतर परिसरात भीतीचे वातावरण निर्माण झाले. घरात जिलेटीनला लावण्यात येणाऱ्या दोन वायरी सापडल्याची माहिती आहे. रात्री उशिरापर्यंत करवीर पोलीस ठाण्यात अज्ञातांविरोधात तक्रार दाखल करण्याचे काम सुरू होते.

दुपारी खिळे ठोकल्याचे आवाज...
दुपारी दोनच्या दरम्यान या बंगल्यातून तीन तरुण तोंडाला मास्क लावून बाहेर पडताना दिसल्याचे स्थानिकांनी सांगितले. त्यामुळे पोलिसांनी या तरुणांचा शोध सुरू केला आहे. पोलिसांनी परिसरातील सीसीटीव्ही ताब्यात घेतले असून त्याद्वारे शोधमोहीम राबवली जाणार आहे. दरम्यान, याच बंगल्यात दुपारी खिळे ठोकल्याचे आवाज येत होते असे काही स्थानिकांनी सांगितले.

पोलिस अधीक्षक घटनास्थळी
पोलिस अधीक्षक नीलोत्पल यांनी घटनास्थळी भेट देत घटनेचा आढावा घेतला. फॉरेन्सिक टीमने घटनास्थळी येत स्फोट नेमका कशामुळे झाला याचा शोध सुरू केला.