पुणे: अखेर पावसाचे आगमन! पुण्यात मुसळधार तर साताऱ्यात दमदार हजेरी; बळीराजाला मोठा दिलासा.

पुणे: राज्यात पावसाची प्रतीक्षा संपली असून, पुणे, मुंबई, सातारा आणि कोकणात पावसाने हजेरी लावल्यामुळे नागरिकांमध्ये आनंदाचे वातावरण आहे. गेल्या काही दिवसांपासून पावसाच्या प्रतीक्षेत असलेल्या आणि उष्णतेने हैराण झालेल्या शहरवासीयांना या पावसामुळे मोठा दिलासा मिळाला आहे.

पुणे शहरात पावसाचा जोर:
पुणे शहरात आज दुपारपासून ढगाळ वातावरण होते आणि दुपारी चारच्या सुमारास पावसाने जोरदार आगमन केले. हडपसर, सिंहगड रोड, कात्रज, कोंढवा आणि कोथरूड या भागांत पावसाचा जोर चांगला होता. या पहिल्याच जोरदार पावसामुळे स्वारगेटच्या मित्र मंडळ चौकात पाणी साचून तलावाचे स्वरूप आले होते. पिंपरी-चिंचवड भागातही पावसाच्या हलक्या सरी कोसळल्या.

 

शेतकऱ्यांना मोठा दिलासा:
सातारा जिल्ह्याच्या पश्चिम ग्रामीण भागात ढगांच्या गडगडाटासह पावसाने दमदार एन्ट्री केली असून परळी खोऱ्यात पावसाने तुफान बॅटिंग केली आहे. पावसाअभावी रखडलेल्या शेतीच्या मशागतीच्या कामांना आता गती मिळणार आहे. पेरणीपूर्व तयारीसाठी सज्ज असलेल्या शेतकऱ्यांना या पावसामुळे मोठा आधार मिळाला असून बळीराजाच्या चेहऱ्यावर समाधानाचे भाव उमटले आहेत.

हवामान अंदाज:
हवामान विभागाने दिलेल्या अंदाजानुसार, २५ जूननंतर राज्यात मान्सूनचे अधिक जोरदार आगमन होण्याची शक्यता आहे. सध्या मुंबई आणि कोकण किनारपट्टीवरही पावसाची रिमझिम सुरू असल्याचे वृत्त आहे.