अमरावती: भीषण थरार! डोळ्यात मिरची पावडर टाकून २३ वर्षीय तरुणाची निर्घृण हत्या; ३ आरोपी गजाआड.

अमरावती: अमरावती शहरात एका २३ वर्षीय तरुणाची अत्यंत क्रूरपणे हत्या करण्यात आल्याची धक्कादायक घटना समोर आली आहे. ओम नावाच्या या तरुणाच्या डोळ्यात मिरची पावडर टाकून हल्लेखोरांनी त्याला दुचाकीवरून खाली पाडले आणि त्यानंतर धारदार शस्त्राने सपासप वार करून त्याची हत्या केली.

नेमकी घटना काय? ओम दुचाकीवरून जात असताना हल्लेखोरांनी अचानक त्याच्या डोळ्यात मिरची पावडर टाकली. यामुळे ओमला काहीच दिसेनासे झाले आणि त्याचा दुचाकीवरील तोल जाऊन तो रस्त्यावर जोरात कोसळला. तो जमिनीवर पडताच हल्लेखोरांनी संधी साधत त्याच्यावर चाकूने सपासप वार केले.
हा हल्ला इतका भीषण होता की, गंभीर जखमी झालेला ओम रक्ताच्या थारोळ्यात पडला आणि जागीच त्याचा मृत्यू झाला.

 

पोलिसांची कारवाई: घटनेची माहिती मिळताच बडनेरा पोलिसांनी तातडीने घटनास्थळी धाव घेतली. पोलिसांनी या प्रकरणात आतापर्यंत तीन संशयितांना ताब्यात घेतले आहे. विशेष म्हणजे, ताब्यात घेण्यात आलेल्यांपैकी एक जण अल्पवयीन आहे, तर उर्वरित दोन आरोपींची नावे संकेत आणि रोशन अशी समोर आली आहेत.
प्राथमिक तपासात ही हत्या जुन्या वैमनस्यातून झाल्याचा संशय व्यक्त केला जात आहे. हल्लेखोरांनी अत्यंत नियोजनबद्ध पद्धतीने हा कट रचला होता, असेही पोलिसांनी नमूद केले. या प्रकरणी बडनेरा पोलीस अधिक तपास करत आहेत.