मुंबई: स्कूटर चोरणारी दुकली जेरबंद; एमआयडीसी पोलिसांच्या धडक कारवाईत लाखांच्या ११ इलेक्ट्रिक स्कूटर हस्तगत

मुंबई: इलेक्ट्रिक स्कूटर चोरी करून मोठा धुमाकूळ घालणाऱ्या एका सराईत चोरट्यांच्या दुकलीला एमआयडीसी पोलिसांनी जेरबंद करण्यात मोठे यश मिळवले आहे. मोहसीन अकबरअली मालतबडे (वय २५, रा. जोगेश्वरी) आणि अरफात हाफीज शेख (वय २२, रा. कुर्ला) असे अटक करण्यात आलेल्या दोन मुख्य आरोपींची नावे आहेत. या दोन्ही आरोपींनी मुंबईतील विविध भागांतून इलेक्ट्रिक स्कूटर चोरून दहशत निर्माण केली होती. एमआयडीसी पोलिसांनी केलेल्या या धडक कारवाईत तब्बल ६ लाख १८ हजार रुपयांच्या एकूण ११ इलेक्ट्रिक स्कूटर जप्त करण्यात आल्या असून, या यशस्वी कारवाईमुळे शहरातील विविध भागांतील वाहन चोरीच्या अनेक गुन्ह्यांचा पर्दाफाश झाला आहे.

पोलिसांनी दिलेल्या सविस्तर माहितीनुसार, एमआयडीसी पोलीस ठाण्याच्या हद्दीतील ओपस सेंटरसमोर पार्क केलेली वैभव गुप्ता (वय २२) यांची इलेक्ट्रिक स्कूटर २० जुलै रोजी अज्ञात चोरट्यांनी लांबवली होती. या प्रकरणी स्कूटर मालकाने तातडीने एमआयडीसी पोलीस ठाण्यात चोरीची तक्रार दाखल केली. तक्रार प्राप्त झाल्यानंतर पोलिसांनी तत्काळ गुन्हा नोंदवून तपासाची चक्रे वेगाने फिरवली. पोलिस उपायुक्त दत्ता नलावडे यांच्या मार्गदर्शनाखाली वरिष्ठ पोलिस निरीक्षक घनश्याम नायर आणि गुन्हे विभागाचे निरीक्षक सुनील करांडे यांच्या प्रत्यक्ष देखरेखीखाली गुन्हे प्रकटीकरण पथकाचे उपनिरीक्षक किरण पर्बत, शिपाई जाधव, लोखंडे, अवघडे, कदम, पवार तसेच तांत्रिक मदतीसाठी अंमलदार विशाल पिसाळ यांच्या पथकाने कसून तपास मोहीम राबवली आणि संशयितांचा शोध घेतला.

तपास दरम्यान आरोपींनी केवळ एमआयडीसी परिसरच नव्हे, तर मुंबई सेंट्रल, चांदीवली, चर्नी रोड, विक्रोळी, दादर, वाकोला, अंधेरी आणि वरळी यांसारख्या मुंबईतील विविध नामांकित व महत्त्वाच्या भागांतून अनेक इलेक्ट्रिक स्कूटर चोरल्याची कबुली दिली आहे. एमआयडीसी पोलीस ठाण्यात दाखल असलेल्या दोन गुन्ह्यांची या कारवाईमुळे उकल झाली असून, अन्य पोलीस ठाण्यांच्या हद्दीत घडलेल्या चोरीच्या घटनांचाही सखोल तपास सुरू आहे. या धडक कारवाईमुळे इलेक्ट्रिक स्कूटर चोरी करणाऱ्या एका मोठ्या व खतरनाक रॅकेटचा पर्दाफाश होण्याची दाट शक्यता वर्तवली जात असून पोलीस अधिक तपास करत आहेत.