पुणे: 'ताई, काम नको करू सांगत होतो...', मोशी येथे ढिगाऱ्याखाली अडकलेल्या बहिणीसाठी भावाचा हंबरडा

पुणे: पिंपरी-चिंचवडमधील मोशी कचरा डेपोच्या परिसरात एक अत्यंत भीषण दुर्घटना घडली आहे. अतिवृष्टीमुळे कचऱ्याचा भलामोठा डोंगर खचून थेट 'वेस्ट टू एनर्जी' प्रकल्पाच्या तीन मजली इमारतीवर कोसळला.

या दुर्दैवी घटनेत इमारत पत्त्याच्या बंगल्याप्रमाणे जमीनदोस्त झाली. सुजाता शिंदे यांचे दुर्दैव:या दुर्घटनेत हाउसकीपिंग विभागात काम करणाऱ्या ५० वर्षीय सुजाता शिंदे ढिगाऱ्याखाली अडकल्या आहेत.

सुजाता शिंदे यांचे पती चार वर्षांपूर्वी निवर्तले असून, गेल्या सात वर्षांपासून त्या या डेपोत काम करून आपल्या तीन मुलींचा सांभाळ करत होत्या. सुजाता यांचे भाऊ विश्वास गवारे यांनी अत्यंत भावूक प्रतिक्रिया दिली. ते म्हणाले, "कचरा डेपो धोकादायक आहे, तिथे काम करू नको असे मी बहिणीला अनेकदा सांगितले होते, परंतु कुटुंबाच्या उदरनिर्वाहासाठी तिच्याकडे दुसरा कोणताही पर्याय नव्हता."

बचावकार्य: इमारत कोसळली तेव्हा त्यात २३ कामगार होते. त्यापैकी काहींनी उड्या मारून जीव वाचवला, तर काही जण ढिगाऱ्याखाली अडकले.

एनडीआरएफ (NDRF) आणि लष्कराच्या जवानांकडून युद्धपातळीवर बचावकार्य सुरू असून आतापर्यंत सात जणांना सुखरूप बाहेर काढण्यात यश आले आहे.

मात्र, ११ कामगार अजूनही ढिगाऱ्याखाली अडकले असल्याची भीती व्यक्त केली जात आहे. लष्कराची टीम, अग्निशमन दल आणि पोलिस प्रशासन मिळून अडकलेल्या व्यक्तींना वाचवण्यासाठी शर्थीचे प्रयत्न करत आहेत.