कोल्हापूर: एसटी स्टँड परिसरात पतीकडून पत्नीची भरदिवसा हत्या

कोल्हापूर: पेठवडगाव येथे भरदिवसा घडलेल्या एका धक्कादायक घटनेने संपूर्ण परिसर हादरून गेला आहे. मोबाईलवर "आज माझा तरी शेवट नाहीतर... पुढच्याचा" असा स्टेटस ठेवल्यानंतर पतीने पत्नीची निर्घृण हत्या केल्याची घटना उघडकीस आली आहे. मृत महिलेचे नाव अमृता कांबळे (वय ३०) असून, आरोपी पती दीपक कांबळे (वय ३५) फरार असून त्याचा पोलीस शोध घेत आहेत.

प्राथमिक माहितीनुसार, दीपक आणि अमृता यांचा सुमारे आठ वर्षांपूर्वी प्रेमविवाह झाला होता. त्यांना दोन मुली आहेत. मात्र, गेल्या काही दिवसांपासून चारित्र्याच्या संशयावरून दोघांमध्ये सतत वाद होत होते. बुधवारी सायंकाळी अमृता या पेठवडगाव एसटी स्टँडच्या पाठीमागील एका कॉम्प्लेक्समध्ये वकिलाला भेटण्यासाठी गेल्या असताना दीपक तेथे पोहोचला. दोघांमध्ये वाद झाल्यानंतर त्याने अमृतावर धारदार शस्त्राने वार केले. गंभीर जखमी झालेल्या अमृताचा घटनास्थळीच मृत्यू झाला.

घटना घडत असताना परिसरात अनेक नागरिक उपस्थित होते. काहींनी आरोपीला थांबवण्याचा प्रयत्न केला असता, "ती माझी पत्नी आहे, तुम्ही मध्ये पडू नका," असे सांगत त्याने पुन्हा हल्ला केला आणि घटनास्थळावरून फरार झाला. घटनेनंतर वडगाव पोलिसांनी पंचनामा करून तपास सुरू केला असून फॉरेन्सिक पथकानेही घटनास्थळावरून पुरावे गोळा केले आहेत. आरोपीच्या अटकेसाठी पोलीस पथके रवाना करण्यात आली आहेत.