नांदेडमध्ये खासदार श्रीकांत शिंदेंच्या ताफ्याचा भीषण अपघात; दुचाकीस्वाराला वाचवताना चार गाड्यांची धडक.

नांदेड: शिवसंवाद दौऱ्यानिमित्त नांदेड दौऱ्यावर आलेल्या शिवसेना शिंदे गटाचे खासदार श्रीकांत शिंदे आणि आरोग्य मंत्री प्रकाश आबिटकर यांच्या ताफ्यातील वाहनांचा अपघात झाला. ताफ्यासमोर अचानक दुचाकी आल्यानं चार गाड्या एकमेकांना आदळल्या. आज गुरुवारी सकाळी ११ वाजेच्या सुमारास शहरातील अण्णाभाऊ साठे चौकात ही घटना घडली. सुदैवाने कोणतीही जीवितहानी झाली नाही, पण वाहनांचे मोठं नुकसान झालं आहे. नायगाव येथील बैठकीला जात असताना हा अपघात घडला.

नेमकं काय घडलं?
खासदार श्रीकांत शिंदे हे राज्यभर शिवसंवाद दौरा करत आहेत. काल बुधवारी रात्री शिंदे यांचं नांदेडमध्ये आगमन झालं. यावेळी त्यांनी नांदेड उत्तर, नांदेड दक्षिण आणि लोहा कंधार विधानसभा मतदार संघातील पदाधिकाऱ्यांची बैठक घेऊन आढावा घेतला. त्यानंतर आज गुरुवारी सकाळी नायगाव येथे बिलोली, देगलूर आणि मुखेड या तीन विधानसभा मतदार संघाची बैठकीचे आयोजन करण्यात आलं. या बैठकीसाठी खासदार श्रीकांत शिंदे आणि आरोग्य मंत्री प्रकाश अबिटकर यांच्यासह शिवसेनेचे आमदार आणि पदाधिकारी हे नायगावकडे रवाना झाले.

बाईकस्वाराला वाचवण्याच्या नादात अपघात
अण्णाभाऊ साठे चौकमार्गे त्यांचा ताफा जात असताना त्यांच्या ताफ्यासमोर अचानक एक दुचाकी आली, त्यानंतर ताफ्यातील एका वाहन चालकानं वाचवण्याच्या प्रयत्नात अचानक ब्रेक लावला. त्यानंतर पाठीमागील चार गाड्या एकमेकांना धडकल्या. अपघात इतका भीषण होता की चारही वाहनांचं मोठं नुकसान झालं. अपघातग्रस्त गाड्यांमध्ये काही कार्यकर्ते आणि आरोग्य विभागातील काही कर्मचारी होते. सुदैवाने कोणालाही दुखापत झाली नसल्याची माहिती आहे.