बीडमध्ये पोलीस उपनिरीक्षकावर जीवघेणा हल्ला; मद्यधुंद टोळक्याची मुजोरी, दोन आरोपींना बेड्या

बीड (धारूर): बीड जिल्ह्याच्या धारूरमध्ये कर्तव्यावर असलेल्या पोलीस पथकावर मद्यधुंद टोळक्याने भीषण हल्ला केल्याची धक्कादायक घटना समोर आली आहे. या हल्ल्यात पोलीस उपनिरीक्षक (PSI) बाबासाहेब भवर गंभीर जखमी झाले असून, या घटनेने जिल्ह्यात मोठी खळबळ उडाली आहे.

नेमकी घटना काय?
मंगळवारी मध्यरात्री पोलीस उपनिरीक्षक बाबासाहेब भवर आपल्या पथकासह धारूर शहराजवळील घाटपाटी परिसरात पेट्रोलिंग करत होते. यावेळी त्यांना एक हॉटेल सुरू असल्याचे आणि काही संशयास्पद हालचाली दिसल्या. पोलिसांनी जेव्हा त्यांना थांबवण्याचा प्रयत्न केला,
तेव्हा मद्यधुंद अवस्थेत असलेल्या आरोपींनी पोलिसांशीच हुज्जत घालण्यास सुरुवात केली. "आम्हाला कोणी काही करू शकत नाही," अशी गर्जना करत राहुल हजारी नावाच्या आरोपीने उपनिरीक्षकाचा गळा पकडून त्यांना धक्काबुक्की केली.

दगडफेक आणि दुखापत: परिस्थिती हाताबाहेर जात असल्याचे पाहून अतिरिक्त पोलीस कुमक मागवण्यात आली. याचा राग आल्याने आरोपींनी अंधाराचा फायदा घेत पोलिसांच्या दिशेने जोरदार दगडफेक सुरू केली.
यातील एक मोठा दगड थेट उपनिरीक्षक भवर यांच्या छातीला लागला, ज्यामुळे ते जखमी झाले.

दोन आरोपींना अटक: याप्रकरणी धारूर पोलिसांनी तात्काळ कारवाई करत अमित कांताप्रसाद तिवारी आणि सुजय गोकुळसिंग
चव्हाण या दोघांना अटक केली आहे. मुख्य आरोपी राहुल हजारी, अमित सद्देवाल आणि मोहन रहिकवाल हे फरार असून पोलीस त्यांचा शोध घेत आहेत. भरवस्तीत पोलिसांवरच असे हल्ले होत असल्याने सामान्य नागरिकांच्या सुरक्षिततेचा
प्रश्न पुन्हा एकदा ऐरणीवर आला आहे.