नागपुर: अवघ्या एकाच दिवसात तीन वेगवेगळ्या महिलांच्या अंगावरील लाखांचे सोन्याचे दागिने लांबवले

नागपूर: शहरातून चेनस्नॅचर्स हद्दपार झाल्याची भावना व्यक्त केली जात असताना आता परत एकाच दिवशी तीन चेनस्नॅचिंगच्या घटना घडल्याने महिला-मुलींमध्ये दहशतीचे वातावरण निर्माण झाले आहे.

सक्करदरा, हुडकेश्वर आणि बेलतरोडी पोलिस ठाण्याच्या हद्दीत शनिवारी दिवसभर या घटना घडल्याचे सांगितले जाते. मिळालेल्या माहितीनुसार, चेनस्नॅचिंगची पहिली घटना दुपारी ३.४० वाजता सक्करदरा पोलिस ठाण्याच्या हद्दीत घडली. सुनीता जाधव नामक महिला बस थांब्याजवळून जात असताना काळ्या रंगाच्या मोटरसायकलवर आलेल्या दोन भामट्यांनी त्यांच्या गळ्यातील सोन्याचे मंगळसूत्र हिसकावून नेले.

दुसरी घटना १० मिनिटांच्या अंतराने घडली. हुडकेश्वरमधील शिला पवनीकर या महिलेचे तीन तोळ्यांचे मंगळसूत्र मोटरसायकलवरच्या भामट्यांनी हिसकावून नेले. तर, रात्री १०.३० च्या सुमारास बेलतरोडीत अशीच एक घटना घडली. शालू धवस नामक महिलेच्या गळ्यातून आरोपींनी सोनसाखळी हिसकावून नेली.

विशेष म्हणजे, शहर पोलिसांनी चोरीची सोनसाखळी विकत घेणाऱ्यांवरही कडक कारवाईचा पवित्रा घेतल्याने आरोपींकडून कुणी सोनसाखळी किंवा चोरीचा कोणताही दागिना घेणे बंद केले. परिणामी या घटना जवळपास बंद झाल्या होत्या. मात्र, आता एकाच दिवशी घडलेल्या या तीन घटनांनी पोलिसांमध्येही खळबळ निर्माण केली आहे.

तिन्ही गुन्ह्यातील आरोपी एकच
सोनसाखळी हिसकावून नेण्याच्या या तीनही घटनांमधील आरोपी एकसारखेच दिसत आहेत. तीनही ठिकाणच्या सीसीटीव्हीमध्ये ते कैद झाले आहेत. त्यामुळे हे गुन्हेगार एकच असावे, असा अंदाज असून, पोलिस त्यांचा शोध घेत आहेत.