नवरी जोमात, नवरा कोमात! लग्नाच्या २४ तासांतच 'भावोजीं'सोबत नवरी पसार; दागिने अन् रोकड घेऊन झाली चंपत.

सागर (मध्य प्रदेश): सागर जिल्ह्यातील जैसीनगर पोलीस ठाण्याच्या हद्दीत एका तरुणाने विधवा महिलेशी लग्न करण्याचा निर्णय घेतला होता. या विवाहासाठी एका मध्यस्थाने त्याला गाठले आणि छत्तीसगड येथील 'रुक्मणी' नावाच्या महिलेचे स्थळ सुचवले. मध्यस्थाने रुक्मणीचा नवरा अपघातात मरण पावल्याची खोटी कथा सांगून तरुणाचा विश्वास संपादन केला आणि लग्नासाठी १ लाख २० हजार रुपये उकळले.

नेमके काय घडले?

ठरल्याप्रमाणे १९ जून रोजी सागर येथे कोर्ट मॅरेज पार पडले आणि २० जून रोजी रानगीर माता मंदिरात हिंदू रीतिरिवाजांनुसार दोघांचे लग्न झाले. लग्नावेळी रुक्मणीसोबत तिचा 'भावोजी' असल्याचे सांगणारा अरविंद विभार नावाचा एक व्यक्ती उपस्थित होता. २१ जूनच्या रात्री जेव्हा घरातील सर्व सदस्य गाढ झोपेत होते, तेव्हा या नववधूने संधी साधली. तिने घरातील कपाट उघडून त्यात ठेवलेले ३० हजार रुपये, चांदीचा कंबरपट्टा, पैंजण आणि मंगळसूत्र असा मौल्यवान ऐवज लंपास केला आणि अरविंदसोबत पलायन केले.

सकाळी धक्कादायक वास्तव:

सकाळी जेव्हा पती आणि कुटुंबाला जाग आली, तेव्हा नवरी घरात नव्हती. घरातील कपाट रिकामे असल्याचे पाहून त्यांना धक्का बसला. ग्रामस्थांनी दिलेल्या माहितीनुसार, रात्री उशिरा एक संशयास्पद कार गावात आली होती आणि त्यातच बसून ही नवरी आपल्या 'भावोजीं'सोबत फरार झाली. पीडित कुटुंबाने तातडीने जैसीनगर पोलीस ठाण्यात तक्रार दाखल केली असून, पोलीस या लुटेरी नवरी आणि तिच्या टोळीचा शोध घेत आहेत.