Baramati : बारामती पोटनिवडणुकीत पहिल्याच दिवशी ‘बाहेरील’ उमेदवारांची एंट्री; तिघांचे उमेदवारी अर्ज दाखल

Baramati : बारामती विधानसभा पोटनिवडणुकीच्या पार्श्वभूमीवर पहिल्याच दिवशी अनपेक्षित घडामोड समोर आली आहे. स्थानिक पातळीवरून एकही अर्ज न येता थेट बाहेरील इच्छुक उमेदवारांनी उमेदवारी अर्ज दाखल केल्याने राजकीय वर्तुळात चर्चांना उधाण आले आहे. या घडामोडींमुळे बारामतीच्या पारंपरिक राजकारणात नव्या समीकरणांची चाहूल लागली आहे.

निवडणूक आयोगाने जाहीर केलेल्या कार्यक्रमानुसार, बारामती आणि राहुरी या दोन विधानसभा मतदारसंघांसाठी 23 एप्रिल 2026 रोजी मतदान होणार असून 4 मे रोजी मतमोजणी होणार आहे. राज्याचे दिवंगत उपमुख्यमंत्री आणि बारामतीचे आमदार अजित पवार तसेच राहुरीचे आमदार शिवाजी भानुदास कर्डिले यांच्या निधनामुळे या जागा रिक्त झाल्या आहेत.

बारामती पोटनिवडणुकीसाठी अर्ज दाखल करण्याच्या पहिल्याच दिवशी तीन उमेदवारांनी अर्ज दाखल केले. विशेष म्हणजे, या तिघांपैकी एकही उमेदवार बारामती मतदारसंघातील नाही. जत तालुक्यातील सतीश कृष्णा कदम यांनी हिंदुस्तान जनता पार्टीकडून, साताऱ्यातील सागर शरद भिसे यांनी अपक्ष म्हणून, तर सोलापूर जिल्ह्यातील सांगोला येथील राघू घुटुकडे यांनी न्यू राष्ट्रीय समाज पार्टीच्या वतीने उमेदवारी अर्ज सादर केला आहे.

या अनपेक्षित घडामोडींमुळे बारामतीतील स्थानिक इच्छुकांमध्ये संभ्रमाचे वातावरण निर्माण झाले आहे. प्रमुख पक्षांचे अधिकृत उमेदवार कोण असणार, याकडे सर्वांचे लक्ष लागले आहे. दरम्यान, काँग्रेस पक्षाने बारामती पोटनिवडणूक लढवण्याची तयारी दर्शवली असून, जिल्हा काँग्रेस कमिटीच्या बैठकीत या निर्णयाला एकमुखी पाठिंबा मिळाला आहे. त्यामुळे काँग्रेसकडून दमदार लढत होण्याची शक्यता व्यक्त केली जात आहे.

याच पार्श्वभूमीवर, ओबीसी नेते लक्ष्मण हाके यांच्या संभाव्य उमेदवारीबाबतही चर्चा रंगू लागली आहे. ते अर्ज दाखल करण्याची शक्यता वर्तवली जात असल्याने निवडणूक अधिक रंगतदार होण्याची चिन्हे आहेत.

दरम्यान, अजित पवार यांच्या निधनानंतर होत असलेल्या या पोटनिवडणुकीत राष्ट्रवादीकडून राज्याच्या उपमुख्यमंत्री सुनेत्रा पवार या रिंगणात उतरणार हे जवळपास निश्चित मानले जात आहे. उमेदवारी अर्ज माघारी घेण्याच्या अंतिम दिवसापर्यंत कोण-कोण उमेदवार मैदानात कायम राहतात, हे पाहणे महत्त्वाचे ठरणार आहे.