पुण्यात रस्ते अपघातांचे सत्र सुरूच! १४ वाहतूक विभाग ठरले 'रेड झोन'; ३८ ब्लॅक स्पॉटवर अवघ्या आठ महिन्यांत १८५ जणांचा मृत्यू

पुणे: पुण्यातील रस्ते अपघातांची वाढती मालिका आणि त्यामुळे होणारे मृत्यू आता अत्यंत चिंतेचा विषय बनले आहेत. पुणे पोलिसांच्या पाहणीतून एक धक्कादायक माहिती समोर आली असून, शहरातील तब्बल १४ वाहतूक विभाग अक्षरशः अपघातांचे 'रेड झोन' ठरले आहेत. या विभागांमधील ३८ अत्यंत धोकादायक अपघातप्रवण ठिकाणांवर म्हणजेच 'ब्लॅक स्पॉट'वर चालू वर्षातील अवघ्या आठ महिन्यांत तब्बल १८५ जणांना आपला जीव गमवावा लागल्याची माहिती समोर आली आहे. विशेष म्हणजे, यातील बहुतांश गंभीर आणि प्राणघातक अपघातांमध्ये अवजड वाहनांचा मोठा सहभाग असल्याचे पोलिसांच्या निदर्शनास आले आहे.

पुणे शहर आणि लगतच्या उपनगरांमध्ये दिवसेंदिवस वाढणारी वाहतूक कोंडी आणि रस्ते अपघातांची वाढती समस्या लक्षात घेऊन पुणे पोलिसांनी संपूर्ण शहरातील अपघातांच्या घटनांचा सविस्तर आढावा घेतला. शहरातील एकूण ३४ वाहतूक विभागांपैकी तब्बल १४ विभागांमध्ये अपघातांचे प्रमाण सर्वाधिक असल्याचे स्पष्ट झाले आहे. या विभागांतील प्रमुख रस्ते, धोकादायक वळणे, उड्डाणपुलांचे उतार आणि गर्दीच्या ठिकाणांची पाहणी करून ३८ 'ब्लॅक स्पॉट' निश्चित करण्यात आले आहेत.

पोलिसांनी जाहीर केलेल्या अहवालानुसार, प्रामुख्याने आंबेगाव, बिबवेवाडी, नऱ्हे, बाणेर, लक्ष्मीनगर, वानवडी, मुंढवा, हडपसर, मांजरी, लोणी काळभोर, फुरसुंगी, लोणीकंद, वाघोली आणि खराडी या प्रमुख वाहतूक विभागांमध्ये अपघातांचे प्रमाण चिंताजनक पातळीवर पोहोचले आहे. या भागांमध्ये ररस्ते सुरक्षा आणि वाहतुकीचे नियम कठोर करण्यासाठी विशेष मोहीम राबविण्याचे नियोजन प्रशासनाकडून केले जात आहे.

वाहतूक नियमांचे उल्लंघन करणाऱ्यांवर कठोर कारवाई

वाढत्या अपघातांना आळा घालण्यासाठी आणि नागरिकांच्या सुरक्षिततेसाठी वाहतूक पोलिसांनी कंबर कसली आहे. आगामी काळात ट्रॅफिक नियम मोडणाऱ्या वाहनचालकांविरोधात विशेष मोहीम हाती घेतली जाणार आहे. यादरम्यान ट्रिपल सीट वाहन चालवणे, चुकीच्या दिशेने (राँग साईड) गाडी चालवणे तसेच फॅन्सी नंबर प्लेट लावून फिरणाऱ्या वाहनचालकांवर मोठ्या प्रमाणावर दंडात्मक व कायदेशीर कारवाई केली जाणार आहे. याशिवाय, ई-चलनाद्वारे कारवाई करण्याचे विशेष अधिकार आता पोलीस उपनिरीक्षक आणि त्यावरील वरिष्ठ अधिकाऱ्यांकडे सोपवण्यात आले आहेत. ब्लॅक स्पॉटवर विशेष लक्ष ठेवणे, वाहतूक नियमन अधिक प्रभावी करणे आणि आवश्यकतेनुसार अतिरिक्त पोलीस मनुष्यबळ तैनात करण्याचे महत्त्वपूर्ण नियोजन पुणे वाहतूक पोलिसांकडून करण्यात येत आहे.