मुंबई: लाडकी बहीण योजनेवर 'कॅग' चा गंभीर ठपका; 3,541 कोटींच्या अतिरिक्त खर्चावर प्रश्नचिन्ह

मुंबई: राज्य सरकारच्या 'मुख्यमंत्री माझी लाडकी बहीण' योजनेबाबत नियंत्रक व महालेखा परीक्षक (कॅग) यांच्या अहवालातून गंभीर बाब समोर आली आहे. योजनेसाठी मंजूर करण्यात आलेल्या निधीपेक्षा 3,541.16 कोटी रुपये अधिक खर्च झाल्याचे अहवालात नमूद करण्यात आले असून, या अतिरिक्त खर्चाचा स्पष्ट तपशील उपलब्ध नसल्याची नोंद करण्यात आली आहे.

राज्य विधिमंडळाच्या पावसाळी अधिवेशनात सादर झालेल्या 2024-25 च्या कॅग अहवालानुसार, लाडकी बहीण योजनेसाठी 29,693.09 कोटी रुपयांची तरतूद करण्यात आली होती. मात्र, महिला व बालविकास विभागाने 33,237.24 कोटी रुपये खर्च केल्याचे अहवालात म्हटले आहे. मंजूर निधीपेक्षा झालेल्या या अतिरिक्त खर्चाबाबत समाधानकारक स्पष्टीकरण नसल्याने आर्थिक व्यवस्थापनावर प्रश्न उपस्थित झाले आहेत.

 

दरम्यान, या मुद्द्यावरून विरोधकांनी सरकारवर जोरदार टीका केली आहे. अतिरिक्त खर्चाचा हिशेब स्पष्ट करण्यात सरकार अपयशी ठरल्याचा आरोप करत त्यांनी या प्रकरणाची सखोल चौकशी करण्याची मागणी केली आहे.

याचवेळी राज्य सरकारने लाडकी बहीण योजनेतील सुमारे 92 लाख लाभार्थी महिलांना अपात्र ठरवत त्यांचा लाभ बंद केला आहे. तसेच, पात्र नसतानाही योजनेचा लाभ घेत असल्याचे आढळलेल्या 29 हजार पुरुषांची नावेही यादीत समाविष्ट असून त्यांच्यावरही कारवाई करण्यात आली आहे.