पुणे: मोशी कचरा डेपो २५ दिवसांच्या चिमुकल्याचे पितृछत्र हरपले, मोशी कचरा डेपो इमारतीचा ढिगारा कोसळल्याने नऊ कुटुंबांचा आधार हिरावला.

पुणे: जिल्ह्यातील पिंपरी-चिंचवड परिसरातील मोशी कचरा डेपो दुर्घटनेने संपूर्ण महाराष्ट्राला हादरवून सोडले आहे. या दुर्घटनेत केवळ नऊ कामगारांचे जीव गेले नाहीत, तर नऊ कुटुंबांचा आधार, स्वप्ने आणि उद्याची आशाही हिरावली गेली आहे. कष्टाच्या कमाईवर संसाराचा गाडा ओढणारे हे कर्ते पुरुष गेल्याने अनेक कुटुंबांचा आर्थिक कणा क्षणार्धात मोडला आहे. या घटनेने सर्वत्र मोठी हळहळ व्यक्त केली जात आहे.

चिमुरड्या बाळाच्या डोक्यावरचे छत्र हरपले:
सुनील भारत कोरके (वय ३४) हे मूळचे करकंब (ता. पंढरपूर) येथील होते आणि गेल्या सहा वर्षांपासून या प्रकल्पात असिस्टंट मॅनेजर म्हणून कार्यरत होते. इमारतीत काम करत असताना कचऱ्याचा ढिगारा कोसळल्याने त्यांचा दुर्दैवी मृत्यू झाला. त्यांच्या पश्चात पत्नी, अवघे २५ दिवसांचे बाळ, गावाकडे राहणारे आई-वडील आणि जुळा भाऊ असा मोठा परिवार आहे. लग्नानंतर दहा वर्षांनी त्यांच्या घरी बाळाचा जन्म झाला होता, ज्यामुळे कुटुंबात आनंदाचे वातावरण होते. मात्र, काळाच्या क्रूर घाताने काही दिवसांतच त्या चिमुरड्याच्या डोक्यावरचे पितृछत्र हरपले.

 

दोन चिमुकल्यांचा आधार हिरावला:
सनी अशोक माने (वय ३६) यांचाही कचऱ्याच्या ढिगाऱ्याखाली दबून मृत्यू झाला. मोशीतील शास्त्रीनगर येथे राहणारे सनी तीन वर्षांपासून 'वेस्ट-टू-एनर्जी' प्रकल्पात वाहन चालक होते. घटनेच्या दिवशी घरी बिर्याणीचा बेत होता, मात्र सहकाऱ्यासोबत जेवण्यासाठी ते कार्यालयात थांबले आणि काळाने त्यांच्यावर झडप घातली. त्यांच्या पश्चात पत्नी कांचन, सात वर्षांचा ईशान आणि दोन वर्षांचा विहान अशी मुले आहेत. कष्ट करून मुलांना चांगले शिक्षण देण्याचे स्वप्न पाहणाऱ्या सनी यांच्या निधनाने कुटुंबावर उपजीविकेचा मोठा प्रश्न उभा राहिला आहे.

लेकींच्या भविष्यासाठी झटणारा हात थांबला:
नागेश सर्जेराव गायकवाड (वय २९) हे तीन वर्षांपासून कंत्राटी कर्मचारी म्हणून कार्यरत होते. दुर्घटनेच्या वेळी प्रशासकीय इमारतीत असताना कचऱ्याचा ढिगारा कोसळल्याने त्यांचा मृत्यू झाला. त्यांच्या मागे पत्नी सोनाली, चार वर्षांची श्रेया आणि दीड वर्षांची प्रिया या दोन मुली, आई-वडील असा परिवार आहे. स्वतःचे घर उभे करणे आणि मुलींना उच्चशिक्षित करणे हे त्यांचे ध्येय होते, परंतु या दुर्घटनेने सर्व काही उद्ध्वस्त केले आहे.