मुंबई: लोकल प्रवाशांसाठी अलर्ट! केळवे स्थानकावर दोन दिवस विशेष ब्लॉक; 'कवच' प्रणालीच्या कामामुळे रेल्वे सेवांवर परिणाम

मुंबई: पश्चिम रेल्वेच्या विरार–डहाणू चौपदरीकरण प्रकल्पाअंतर्गत केळवे (Kelwe Road) स्थानकावर अत्याधुनिक इलेक्ट्रॉनिक इंटरलॉकिंग आणि 'कवच' (Kavach) सुरक्षा प्रणाली कार्यान्वित करण्यासाठी आज (१४ जुलै) आणि उद्या (१५ जुलै) विशेष ब्लॉक घेण्यात येणार आहे. या कामामुळे पश्चिम रेल्वेवरील काही लोकल तसेच प्रवासी गाड्यांच्या वेळापत्रकावर परिणाम होणार आहे.

रेल्वे प्रशासनाच्या माहितीनुसार, १४ जुलै रोजी प्री-नॉन इंटरलॉकिंग ब्लॉक घेऊन सिग्नलिंग यंत्रणेमध्ये आवश्यक बदल करण्यात येतील. त्यानंतर १५ जुलै रोजी नॉन-इंटरलॉकिंग ब्लॉकदरम्यान नवीन इलेक्ट्रॉनिक इंटरलॉकिंग आणि 'कवच' प्रणालीचे कमिशनिंग करण्यात येणार आहे. या काळात काही लोकल गाड्या रद्द, शॉर्ट टर्मिनेट किंवा शॉर्ट ओरिजिनेट करण्यात येणार आहेत.

'कवच' ही भारतीय रेल्वेची स्वदेशी स्वयंचलित ट्रेन संरक्षण प्रणाली असून, सिग्नल उल्लंघन, धडक टाळणे आणि रेल्वे प्रवास अधिक सुरक्षित करण्यासाठी ती महत्त्वाची मानली जाते. या तंत्रज्ञानामुळे भविष्यात रेल्वे वाहतुकीची सुरक्षितता आणि कार्यक्षमता वाढण्यास मदत होणार आहे.

रेल्वे प्रशासनाने प्रवाशांना प्रवासापूर्वी आपल्या गाडीची वेळ आणि स्थिती तपासूनच प्रवास करण्याचे आवाहन केले आहे. ब्लॉकमुळे काही सेवांमध्ये उशीर किंवा बदल होण्याची शक्यता असल्याने प्रवाशांनी अतिरिक्त वेळ गृहीत धरावा, असेही सांगण्यात आले आहे.