मुंबई: लोकलमध्ये दरवाजा बंद करण्याच्या वादातून २२ वर्षीय तरुणाची चाकूने भोसकून हत्या!

मुंबई: जीवनवाहिनी असलेल्या लोकल ट्रेनमध्ये २२ वर्षीय तरुणाची अत्यंत निर्घृणपणे हत्या झाल्याची धक्कादायक घटना समोर आली आहे. मयंक लोहार असे मृत तरुणाचे नाव असून, चर्चगेट-नालासोपारा फास्ट लोकलच्या फर्स्ट क्लास डब्यात ही घटना घडली.

नेमकी घटना काय? मंगळवारी रात्रीच्या सुमारास मयंक लोहार हा कामावरून परतताना अंधेरी स्थानकावरून ट्रेनमध्ये चढला. बाहेर मुसळधार पाऊस पडत असल्याने डब्यातील पाणी आत येऊ नये म्हणून प्रवाशांनी दरवाजा बंद करण्यास सांगितले होते.
याच कारणावरून मयंक लोहार आणि आरोपी रोशन सुवर्णा यांच्यात वाद झाला. वाद इतका विकोपाला गेला की, आरोपीने आपल्या बॅगेतून चाकू काढून मयंकच्या छातीवर आणि पोटावर सपासप वार केले. या हल्ल्यात मयंक गंभीर जखमी झाला आणि उपचारादरम्यान त्याचा मृत्यू झाला.

 

आरोपीची धरपकड: घटनेनंतर आरोपी रोशन सुवर्णा हा बोरिवली स्थानकावर गाडीतून उतरून पसार झाला होता. सीसीटीव्हीमध्ये तो अत्यंत शांतपणे चालताना दिसून आला. रेल्वे पोलिसांनी (GRP) सुमारे ४०० सीसीटीव्ही कॅमेऱ्यांचे फुटेज आणि आरोपीच्या बॅगेवरील एका विशिष्ट लोगोचा आधार घेत शोध मोहीम राबवली. आरोपी हा कर्नाटकातील मंगळुरूला पळून जाण्याच्या तयारीत असताना पोलिसांनी त्याला पनवेल परिसरातून अटक केली.

तपासातील खुलासे: आरोपी हा मिरा रोडचा रहिवासी असून, तो मुंबई विमानतळावरील एका कार्गो फॅसिलिटीमध्ये कार्यरत होता. पोलिसांनी दिलेल्या माहितीनुसार, त्याने गुन्ह्यापूर्वी मद्यपान केले होते. या घटनेमुळे मुंबई लोकलच्या सुरक्षिततेचा प्रश्न पुन्हा एकदा ऐरणीवर आला आहे.