ओडिशा: इंजिनिअरच्या घरी 'कुबेराचा खजिना'! २ कोटींची रोकड, ३०० ग्रॅम सोने आणि १८ मालमत्ता; पाहून अधिकारीही चक्रावले!

ओडिशा: कंधमाल जिल्ह्यातील बालीगुडा येथे एका सरकारी इंजिनिअरच्या घरी झालेल्या छापेमारीने सर्वांचेच डोळे विस्फारले आहेत. 'इंटीग्रेटेड ट्रायबल डेव्हलपमेंट एजन्सी' (ITDA) चे असिस्टंट एक्झिक्युटिव्ह इंजिनिअर (AEE) बैकुंठ नाथ बेहरा यांच्या तब्बल ९ ठिकाणांवर दक्षता विभागाने (Vigilance Department) शनिवारी (६ जून २०२६) छापे टाकले. उत्पन्नाच्या स्रोतापेक्षा अधिक संपत्ती बाळगल्याच्या आरोपावरून ही मोठी कारवाई करण्यात आली.

काय काय सापडले?
या कारवाईत बेहरा यांच्याकडे अफाट संपत्ती आढळून आली:

रोख रक्कम: त्यांच्या पत्नीच्या नावावर असलेल्या दोन बँक लॉकर्समधून तब्बल २ कोटी रुपयांची रोकड जप्त करण्यात आली. ही रोकड इतकी प्रचंड होती की, ती मोजण्यासाठी अधिकार्‍यांना बँकेतून 'कॅश काउंटिंग मशीन' मागवावे लागले.

दागिने: ३०० ग्रॅमपेक्षा अधिक सोने जप्त करण्यात आले आहे.

इमारती आणि प्लॉट्स: तपासात बेहरा यांच्या ५ आलिशान इमारती आणि १३ महागडे प्लॉट्स सापडले आहेत. यामध्ये भुवनेश्वरमधील चार बहुमजली इमारती (नीलाद्री विहार, शैलश्री विहार, कानन विहार आणि चंद्रशेखरपूर) आणि जाजपूर येथील इमारतीचा समावेश आहे. तसेच भुवनेश्वर, जाजपूर आणि बारीपदा यांसारख्या प्रमुख शहरांत १३ जमिनीचे प्लॉट आढळून आले आहेत.

६ हजार पगारापासून सुरुवात, आता कोट्यवधींचे मालक
५२ वर्षीय बैकुंठ नाथ बेहरा हे १९९९ मध्ये अवघ्या ६,००० रुपये मासिक पगारावर ज्युनिअर इंजिनिअर म्हणून सरकारी सेवेत रुजू झाले होते. अनेक वर्षांच्या सेवाकाळात त्यांना पदोन्नती मिळाली, मात्र त्यांच्या कमाईचे हे साधन पाहून तपास यंत्रणाही थक्क झाल्या आहेत. सरकारी नोकरीच्या आडून त्यांनी अमाप संपत्ती कशी जमा केली, याचा सखोल तपास आता सुरू आहे.