महाराष्ट्र: 'कलम १५५'चा गैरवापर केल्याप्रकरणी १५ अधिकारी निलंबित; जमीन घोटाळ्याप्रकरणी मोठी कारवाई.

महाराष्ट्र: जमीन महसूल संहितेतील 'कलम १५५'चा गैरवापर करून जमिनींच्या मालकी हक्कात फेरफार करणाऱ्या १५ महसूल अधिकाऱ्यांवर राज्य सरकारने निलंबनाची कठोर कारवाई केली आहे. महसूलमंत्री चंद्रशेखर बावनकुळे यांच्या आदेशानंतर ही कारवाई करण्यात आली असून, यामुळे महसूल विभागात मोठी खळबळ उडाली आहे.

काय आहे प्रकरण?
'कलम १५५'चा वापर केवळ शुद्धलेखनाच्या किंवा लिपिकीय चुका (clerical errors) सुधारण्यासाठी करणे अपेक्षित असते. मात्र, संबंधित अधिकाऱ्यांनी या अधिकाराचा गैरवापर करून जमिनींच्या मालकी हक्कात बेकायदेशीर फेरफार केले. काही प्रकरणांत एकाची मालमत्ता दुसऱ्याच्या नावावर करण्याचे गंभीर प्रकार उघडकीस आले आहेत. इतकेच नव्हे, तर पुरावे नष्ट करण्यासाठी काही फायली गायब करण्यात आल्या असून, त्याबाबत 'प्रशासकीय आणि सार्वजनिक अभिलेख अधिनियम २००५'नुसार फौजदारी गुन्हे दाखल करण्याची प्रक्रिया सुरू करण्यात आली आहे.

 

निलंबित अधिकाऱ्यांची नावे:
या कारवाईत जुन्नरचे तहसीलदार रवींद्र सबनीस, नागपूरचे उपजिल्हाधिकारी मधुसूदन बर्गे, धाराशिवचे भूसंपादन अधिकारी श्रीकांत पाटील, वाशीमचे उपजिल्हाधिकारी संजय नागटिळक आणि गीता गायकवाड, सोलापूरच्या विशेष दंडाधिकारी वैशाली वाघमारे, तहसीलदार एल. डी. शेख, तहसीलदार अभय चव्हाण, तहसीलदार रंजना वरहंडे, मंडलाधिकारी शरद गाडे, ग्राम महसूल अधिकारी संगीता लांडे, मंडलाधिकारी मल्लप्पा ढाणे आणि ग्राम महसूल अधिकारी सुजाता रच्चेवार यांचा समावेश आहे.

पुढील दिशा:
प्राथमिक चौकशीत या अधिकाऱ्यांनी कायदेशीर तरतुदी आणि प्रशासकीय नियमांचे उल्लंघन केल्याचे निष्पन्न झाले आहे. चौकशी पूर्ण होईपर्यंत हे सर्व अधिकारी निलंबित राहणार आहेत. राज्यातील जमीनविषयक प्रकरणांत पारदर्शकता आणण्यासाठी सरकारने यापुढेही कठोर धोरण राबवण्याचे संकेत दिले आहेत.