तुरुंगात बनला रोहित शेट्टीच्या घरावरील गोळीबाराचा प्लॅन; कोण आहे मास्टरमाईंड?

दिग्दर्शक रोहित शेट्टीच्या इमारतीबाहेर गोळीबाराच्या प्रकरणाच्या तपासाला नवं वळण मिळालं आहे. गोळीबाराचा हा कट तुरुंगातून रचला गेल्याचा पोलिसांना संशय आहे. फरार आरोपी शुभम लोणकरचा भाऊ प्रवीण लोणकरने तुरुंगातून हा सगळा कट रचल्याचा संशय पोलिसांना आहे. प्रवीण लोणकर सध्या बाबा सिद्दीकी हत्या प्रकरणात न्यायालयीन कोठडीत असून पोलिसांच्या मते त्याने तुरुंगात राहूनच शस्त्रे आणि पैशांची व्यवस्था केली अशी धक्कादायक माहिती समोर येत आहे. या प्रकरणात मुख्य शूटरसह आतापर्यंत 12 आरोपींना पुणे, हरियाणा आणि उत्तर प्रदेश इथून अटक करण्यात आली आहे.

प्रवीण लोणकर आधीपासून जेलमध्ये असल्याने त्याला या प्रकरणात औपचारिक अटक करून रिमांडवर घेण्याची तयारी पोलिसांकडून सुरू आहे. पोलीस सूत्रांच्या माहितीनुसार घटनेत वापरलेली मोटारसायकल, पिस्तूल आणि फंडिंगची व्यवस्था प्रवीण लोणकरच्या इशाऱ्यावर करण्यात आली होती. तुरुंगात राहून त्याने हे ऑपरेशन कसं चालवलं यावर तपास सुरू आहे. या हाय-प्रोफाइल गोळीबाराच्या घटनेत मुंबई पोलिसांनी मकोका (MCOCA) लावला आहे.

प्रवीण लोणकरने तुरुंगात हा संपूर्ण मास्टरप्लॅन केल्याचा संशय गुन्हे शाखेला आहे. त्यामुळे प्रवीणने तुरुंगात असताना हे सर्व कसं केलं, तो कोणाच्या संपर्कात होता, संदेशांची देवाणघेवाण करण्यासाठी त्याने कोणत्या माध्यमांचा वापर केला, तुरुंगात त्याला कोण मदत करत होतं, हे मोठे प्रश्न आहे गुन्हे शाखेसमोर आहेत. गुन्हे शाखेच्या 12 पथकांकडून या प्रकरणाचा तपास सुरू असल्याची माहिती एका वरिष्ठ पोलीस अधिकाऱ्याने दिली.

पोलिसांनी दिलेल्या माहितीनुसार, 20 जानेवारी रोजी आरोपी सिद्धार्थ येनपुरे आणि समर्थ यांनी पुण्याहून मुंबईला एक दुचाकी आणली आणि ती मुंबईतील विलेपार्ले रेल्वे स्थानकाबाहेर पार्क केली. हीच दुचाकी गोळीबार करणाऱ्याने वापरल्याचा आरोप आहे. गोळीबार करणारा आरोपी हा मूळचा बिहारचा रहिवासी असून चार ते पाच साथीदारांसह तो मुंबईत राहिला होता. घटनेपूर्वी त्याने रोहित शेट्टीच्या घराची तीन ते चार वेळा पाहणी केली होती, असंही म्हटलं जात आहे.