कृषी पदवी प्रवेशाची पहिली यादी जाहीर; राज्यातील ९ व्यावसायिक अभ्यासक्रमांसाठी १०,८७१ विद्यार्थ्यांना मिळाली प्रवेशाची संधी

राज्यातील कृषी व संलग्न विद्यापीठांच्या विविध पदवी अभ्यासक्रमांच्या प्रवेशासाठी महत्त्वाची अपडेट समोर आली आहे. राज्य सामायिक प्रवेश परीक्षा कक्षातर्फे (CET Cell) शैक्षणिक वर्ष २०२६-२७ करीता राज्यातील चारही कृषी विद्यापीठांच्या आणि त्यांच्याशी संलग्न महाविद्यालयांमधील विविध व्यावसायिक पदवी अभ्यासक्रमांच्या केंद्रीय प्रवेश प्रक्रियेची (CAP Round 1) पहिली प्रवेश यादी जाहीर करण्यात आली आहे. या पहिल्या फेरीत राज्यभरातून तब्बल १०,८७१ विद्यार्थ्यांना प्रवेश मिळाला असून, हजारो विद्यार्थ्यांचे उच्च शिक्षणाचे स्वप्न साकार होण्याच्या दिशेने पाऊल पडले आहे.

या प्रवेश प्रक्रियेसाठी राज्यभरातून एकूण २३,८०३ विद्यार्थ्यांनी नोंदणी केली होती. त्यापैकी १८,९९३ विद्यार्थ्यांनी आपल्या पसंतीचे महाविद्यालय व अभ्यासक्रमांचे पर्याय (Choice Filling) मुदतीत यशस्वीरित्या भरले होते. या पात्र विद्यार्थ्यांमधून पहिल्या फेरीची प्रवेश यादी तयार करण्यात आली आहे. विशेष म्हणजे, ज्या विद्यार्थ्यांना त्यांच्या पसंतीक्रमातील पहिल्या क्रमांकाचे महाविद्यालय मिळाले आहे, अशा ३,१४७ विद्यार्थ्यांचे प्रवेश 'ऑटो फ्रिज' (Auto Freeze) करण्यात आले आहेत. या विद्यार्थ्यांना ते महाविद्यालय सक्तीचे असणार असून, त्यांनी प्रवेश न घेतल्यास त्यांना पुढील फेऱ्यांमध्ये सहभागी होण्यास मुभा मिळणार नाही, असा स्पष्ट नियम आहे.

विद्यापीठनिहाय मिळालेले प्रवेश:

या पहिल्या प्रवेश फेरीत राज्यातील चार प्रमुख कृषी विद्यापीठांतर्गत येणाऱ्या महाविद्यालयांमध्ये विद्यार्थ्यांनी प्रवेश मिळवले आहेत:

• महात्मा फुले कृषी विद्यापीठ, राहुरी: ४,७०० विद्यार्थी

• वसंतराव नाईक मराठवाडा कृषी विद्यापीठ, परभणी: २,९६८ विद्यार्थी

• डॉ. पंजाबराव देशमूक कृषी विद्यापीठ, अकोला: २,४६९ विद्यार्थी

• डॉ. बाळासाहेब सावंत कोकण कृषी विद्यापीठ, दापोली: ७३४ विद्यार्थी

अभ्यासक्रमनिहाय प्रवेशाची स्थिती:

कृषी आणि संलग्न नऊ व्यावसायिक अभ्यासक्रमांसाठी ही प्रवेश प्रक्रिया राबविण्यात येत आहे:

• बीएससी (ऑनर्स) कृषी (Agriculture): ७,८७८ जागा

• बी.टेक अन्न तंत्रज्ञान (Food Technology): ८६२ जागा

• बीएससी (ऑनर्स) उद्यानविद्या (Horticulture): ५५९ जागा

• बी.टेक बायोटेक्नॉलॉजी: ५५३ जागा

• बीएससी (ऑनर्स) कृषी व्यवसाय व्यवस्थापन (Agri Business Management): ४९५ जागा

• बी.टेक कृषी अभियांत्रिकी (Agricultural Engineering): ४१४ जागा

• बीएससी (ऑनर्स) वनीकरण (Forestry): ५३ जागा

• बीएससी (ऑनर्स) समुदाय विज्ञान (Community Science): ३३ जागा

• मत्स्यविज्ञान (Fishery Science): २४ जागा

ज्या विद्यार्थ्यांना पहिल्या फेरीत महाविद्यालये अलॉट झाली आहेत, त्यांनी १७ ऑगस्ट ते १९ ऑगस्ट दरम्यान संबंधित महाविद्यालयात प्रत्यक्ष जाऊन कागदपत्रांची पडताळणी व प्रवेश प्रक्रिया पूर्ण करणे अनिवार्य आहे. कागदपत्रांची तपासणी झाल्यानंतर विद्यार्थ्यांना प्रवेश स्वीकृतीसाठी १ हजार रुपयांचे शुल्क भरून 'फ्रीज' किंवा 'फ्लोट' यापैकी योग्य तो पर्याय निवडावा लागणार आहे. या प्रक्रियेमुळे कृषी शिक्षणासाठी उत्सुक असलेल्या विद्यार्थ्यांमध्ये मोठा उत्साह दिसून येत आहे.