पुणे: दगडूशेठ गणपती मंदिराच्या विस्ताराचा मार्ग मोकळा फरासखाना-विश्रामबाग पोलीस ठाण्याची जागा ट्रस्टला देण्याबाबत पोलिसांकडून प्रस्ताव सादर

 

पुणे: जगप्रसिद्ध श्रीमंत दगडूशेठ हलवाई सार्वजनिक गणपती मंदिराच्या विस्ताराचा मार्ग आता मोकळा होण्याची चिन्हे निर्माण झाली आहेत. मंदिरालगत असलेली फरासखाना आणि विश्रामबाग पोलीस ठाण्याची मोक्याची जागा दगडूशेठ गणपती ट्रस्टला हस्तांतरित करण्यासाठी पुणे पोलिसांनी राज्य सरकारच्या गृह विभागाकडे प्रस्ताव पाठवला असून, या प्रस्तावास तत्त्वत: 'ना-हरकत' (NOC) दर्शविण्यात आली आहे. या निर्णयामुळे भाविकांसाठी चांगल्या सुविधा उपलब्ध करून देणे शक्य होणार आहे.

नेमका प्रस्ताव काय आहे? छत्रपती शिवाजी महाराज रस्त्यावरील फरासखाना आणि विश्रामबाग पोलीस ठाण्याची सध्याची इमारत १९७६-७७ मध्ये बांधण्यात आली होती. या जुन्या इमारतीत पुणे पोलिसांच्या पश्चिम विभागाचे मुख्यालय, परिमंडळ एकचे पोलीस उपायुक्त कार्यालय, सहायक पोलीस आयुक्त कार्यालय, वाहतूक विभाग आणि फरासखाना-विश्रामबाग पोलीस ठाणे कार्यरत आहे. दगडूशेठ मंदिरात वर्षभर, विशेषतः संकष्टी व अंगारक चतुर्थी तसेच गणेशोत्सवात लोटणाऱ्या अलोट गर्दीचा विचार करून मंदिराच्या विस्तारीकरणासाठी या जागेची गरज भासत होती.

पुण्याचे पोलीस आयुक्त अमितेश कुमार यांनी यासंदर्भातील प्रस्ताव गृह विभागाच्या अपर मुख्य सचिवांकडे नुकताच सादर केला आहे. या प्रस्तावानुसार, बुधवार पेठेतील महापालिकेची जागा (सिटी सर्व्हे क्रमांक १११२ आणि १११३) प्रथम पोलीस दलाच्या नावावर हस्तांतरित केली जाईल. या नव्या जागेवर पोलिसांसाठी अत्याधुनिक आणि प्रशस्त इमारत बांधण्यात येणार असून, नवीन इमारतीचे बांधकाम पूर्ण झाल्यानंतरच फरासखाना व विश्रामबाग पोलीस ठाण्याचे कामकाज पूर्णपणे त्या नवीन ठिकाणी स्थलांतरित केले जाईल. त्यानंतरच सध्याची जुनी जागा दगडूशेठ गणपती ट्रस्टकडे हस्तांतरित करण्याची पुढील प्रक्रिया पार पडेल.

सुविधांचा विस्तार आणि नियोजन: बुधवार पेठेतील नियोजित नवीन जागेचे क्षेत्रफल सुमारे ७५९.२० चौरस मीटर असून, तिथे ३.५ च्या एफएसआयमुळे सुमारे २८,६२१ चौरस फुटांचे बांधकाम करणे शक्य होणार आहे. तर फरासखानाची सध्याची जागा ८७३.७० चौरस मीटर असून येथील बांधकाम सुमारे २२ हजार चौरस फुटांचे आहे. नवीन इमारतीचे बांधकाम पोलीस गृहनिर्माण किंवा दगडूशेठ ट्रस्टकडून केले जाण्याबाबतच्या अटी व शर्ती या प्रस्तावात नमूद करण्यात आल्या आहेत. पोलीस ठाण्याचे स्थलांतर झाल्यानंतर मंदिराच्या विस्तारीकरणाला प्रत्यक्ष सुरुवात होईल, ज्यामुळे आगामी काळात लाखो भाविकांच्या सुरक्षेचा आणि सोयी-सुविधांचा प्रश्न सुटण्यास मोठी मदत होणार आहे.