सांगली: "मेस बदलली म्हणून विद्यार्थ्याला लाथाबुक्क्यांनी अमानुष मारहाण; विटा येथील 'गुरुकुल'मधील प्रकाराने खळबळ."

सांगली: मेस बदलल्याच्या कारणावरून झालेल्या वादातून १७ वर्षीय विद्यार्थ्याला छातीवर व पोटावर लाथाबुक्क्यांनी मारहाण केल्याची घटना विटा येथील रेवानगर उपनगरात असलेल्या संत ज्ञानेश्वर गुरुकुल अकॅडमी, विटा येथे घडली. याप्रकरणी विटा पोलिस ठाण्यात अमोल बाळासाहेब पवार (रा. बलवडी-भाळवणी, ता. खानापूर) याच्याविरुद्ध अदखलपात्र गुन्ह्याची नोंद केली आहे.

त्या जखमी विद्यार्थ्याबाबत पोलिसांनी दिलेल्या माहितीनुसार, बलवडी-भाळवणी येथील अमोल पवार याची विटा नगरपालिका हद्दीतील खानापूर रस्त्यावरील रेवानगर येथील पार्वतीनगर येथे संत ज्ञानेश्वर गुरुकुल अकॅडमी आहे. पीडित विद्यार्थी हा जून २०२६ पासून रेवानगर, विटा येथील संत ज्ञानेश्वर गुरुकुल अकॅडमी येथे भरतीच्या सरावासाठी राहत आहे. ८ ऑगस्ट रोजी रात्री साडेदहाच्या सुमारास मेस का बदलली, या
कारणावरून त्याचा अमोल पवार याच्याशी वाद झाला.

 

 

या वादातून पवार याने अल्पवयीन विद्यार्थ्याच्या छातीवर व पोटावर लाथाबुक्क्यांनी मारहाण केली. याप्रकरणी विद्यार्थ्याने सोमवारी विटा पोलिस ठाण्यात तक्रार दिली. दरम्यान जखमी विद्यार्थ्यास उपचारासाठी कोल्हापूरच्या सीपीआरमध्ये दाखल केले आहे. त्याच्यावर उपचार सुरू आहेत. याची नोंद कोल्हापूरच्या सीपीआर पोलिस चौकीत झाली आहे.

"माझा मुलगा संत ज्ञानेश्वर अकॅडमीत आहे. अकॅडमीच्या संबंधित मेसमध्ये तो जेवत होता. मात्र त्या जेवणात अळ्या सापडल्या. यामुळे मुलाने मेस बदलली. त्याचा राग मनात धरून अमोल पवार याने रात्री ११ वाजता झोपलेल्या मुलास उठवून अमानुष मारहाण केली. याची विचारणा केल्यानंतर मलाही दमदाटी केली. - जखमी विद्यार्थी याचे वडील'