चंद्रपूर: "पप्पा, मला का मारताय?" बापाच्या हल्ल्यातून १२ वर्षांच्या मुलाने स्वतःचा जीव वाचवला;

चंद्रपूर: 'पप्पा, देवांशला का मारले, मला का मारताय?...' अवघ्या १२ वर्षाच्या रुषांतचा हा काळीज पिळवटून टाकणारा आक्रोश आणि रक्ताने माखलेल्या हातांनी बापाला दिलेला धक्का.. या प्रसंगावधानामुळेच शक्तीनगर येथील नराधम बापाच्या तावडीतून रुषांतचा जीत थोडक्यात वाचला! अन्यथा निष्पाप ७ वर्षांच्या देवांशप्रमाणेच त्याच्याही आयुष्याची ज्योत त्या निर्दयी बापाने विझवली असती. दुर्गापूर शक्तीनगर येथील पोटच्या दोन गोळ्यांवर जन्मदात्यानेच केलेल्या प्राणघातक हल्ल्याच्या घटनेत आता काळीज पिळवटून टाकणारे नवे खुलासे समोर आले आहेत.

कौटुंबिक वादातून आरोपी मंगेश बदखल याची पत्नी गेल्या सात महिन्यांपासून वेगळी राहत होती. रविवारी मंगेशने तिला परत आणण्यासाठी मनधरणी केली, मात्र तिने येण्यास नकार दिला. याच नैराश्यातून मंगेशच्या डोक्यात संपूर्ण कुटुंबच संपवण्याचा क्रूर कट शिजला. सोमवारी सायंकाळी त्याने दुकानातून नवीन ब्लेड खरेदी केले. घरात दोन्ही मुलांना बोलावून आधी निष्पाप देवांशची मान वर केली आणि त्याच्या गळ्यावर एकापाठोपाठ दोन धारधार ब्लेडने वार केले. देवांश रक्ताच्या थारोळ्यात तडफडून खाली कोसळला.

 

धाकट्या भावाचा डोळ्यांसमोर पडलेला मृतदेह पाहून १२ वर्षाचा रुषांत सुन्न झाला. तेवढ्यात रक्ताने माखलेल्या नराधम बापाने नवीन ब्लेड काढून रुषांतच्याही गळ्यावर फिरवला. दरम्यान रुषांतने कमालीचे प्रसंगावधान दाखवले. "पप्पा, मला का मारताय? देवांशला का मारले?" असा आक्रोश करत त्याने नराधम बापाचा हात जोरात झटकून चपळतेने शेजारच्या खोलीत जाऊन आतून दार बंद करून घेतले. रुषांत गळ्यातून रक्त वाहू लागल्याने, तोही मरेल या आशेने मंगेशने स्वतः गळफास घेण्याचा प्रयत्न केला. इतक्यात त्याचा लहान भाऊ घरी आला आणि हा भीषण प्रकार उघडकीस आला. त्याने तातडीने दोन्ही मुलांना रुग्णालयात दाखल केले, परंतु दुर्दैवाने देवांशचा आधीच मृत्यू झाला होता. तर रुषांतवर वेळेत उपचार सुरू झाल्याने त्याचे प्राण वाचले. दुर्गापूरचे पोलिस निरीक्षक संतोष शेगोकर यांनी सोमवारी सायंकाळी अटक करुन मंगळवारी न्यायालयात हजर केले असता न्यायाधीशांनी दोन दिवसांची पोलिस कोठडी सुनावली

रुषांतच्या गळ्यावर तब्बल ९ टाके
बापाशी झालेल्या झटापटीत रुषांतच्या गळ्यावर गंभीर दुखापत झाली असून त्याच्या मानेवर तब्बल ९ टाके पडले आहेत. सध्या रुग्णालयात त्याच्यावर उपचार सुरू असून प्रकृती स्थिर आहे. गुन्ह्यात वापरलेले धारदार ब्लेड जप्त केले असून, आरोपीच्या कपड्यांवरील रक्ताचे डाग, घटनास्थळावरील रक्ताचे जखमी नमुने आणि डीएनए सॅम्पल्स फॉरेन्सिक लॅबकडे पाठवण्यात येत असल्याचे दुर्गापूरचे पोलिस निरीक्षक संतोष शेगोकर यांनी 'लोकमत'शी बोलताना सांगितले.

मानसिकतेची जुनी मुळे; वरोऱ्यात दाखल होता ३७६ चा गुन्हा
नराधम मंगेश बदखल हा विकृत अन् क्रूर मानसिकतेचा असल्याचे तपासात समोर आले आहे. ७ वर्षांपूर्वी त्याच्याविरुद्ध वरोरा पोलिस ठाण्यात बलात्काराप्रकरणी कलम ३७६ अन्वये गुन्हा दाखल झाला होता, अशी माहिती पोलिस सूत्रांनी दिली आहे.