पुणे: 'पीएमआरडीए'चा मोठा निर्णय; 'जीआयएस' पोर्टल सज्ज, सर्व नियोजन माहिती आता एका 'क्लिक'वर!

पुणे: महानगर प्रदेश विकास प्राधिकरणाने (PMRDA) नागरिकांना पारदर्शक, वेगवान आणि तंत्रज्ञानस्नेही सेवा देण्याच्या दृष्टीने एक महत्त्वपूर्ण पाऊल उचलले आहे. पीएमआरडीए क्षेत्रातील नागरिक, विकासक, वास्तुविशारद, व्यावसायिक, अभियंते आणि शासकीय विभागांना प्राधिकरणाच्या नियोजनविषयक सर्व मूलभूत माहितीची सुलभ उपलब्धता व्हावी, यासाठी जीआयएस (GIS) आधारित सार्वजनिक वेब पोर्टल तयार करण्यात आले आहे. या डिजिटल उपक्रमामुळे नागरिकांना आता पीएमआरडीएच्या कार्यालयात प्रत्यक्ष फेऱ्या मारण्याची गरज उरणार नाही आणि घरबसल्या सर्व माहिती सहज उपलब्ध होईल.

पोर्टलवर उपलब्ध असणाऱ्या सुविधा आणि माहिती:

१. नियोजन आणि प्रशासकीय सीमा:

• पीएमआरडीएच्या संपूर्ण कार्यक्षेत्राची अधिकृत हद्द आणि मंजूर प्रादेशिक योजना (Regional Plan - RP).

• प्रस्तावित नगररचना योजना (Town Planning - TP Schemes).

• गावहद्द, महानगरपालिका आणि नगरपरिषदांच्या प्रशासकीय सीमा.

२. पायाभूत सुविधा (Infrastructure):

• महाराष्ट्र राज्य रस्ते विकास महामंडळ (MSRDC) आणि PMRDA चे प्रस्तावित रिंग रोड.

• पुणे मेट्रो प्रकल्प मार्ग (Metro Corridors) व मेट्रो स्टेशन परिसरातील ट्रान्सिट ओरिएंटेड डेव्हलपमेंट (TOD) झोन.

• रेल्वे मार्ग आणि सार्वजनिक बांधकाम विभागाचे (PWD) वर्गीकृत रस्ते.

३. पर्यावरण, सुरक्षा व इतर क्षेत्रे:

• पाटबंधारे विभागाने निश्चित केलेल्या नद्यांच्या पूररेषा (लाल व निळी रेषा).

• वन्यजीव अभयारण्य, हिल स्टेशन आणि विशेष टाउनशिपच्या सीमा.

• संरक्षण क्षेत्रांच्या सुरक्षेसाठी NDA, HEMRL, पुरंदर प्रस्तावित विमानतळ (MADC) व इतर लष्करी संस्थांचे बफर झोन टप्प्याटप्प्याने उपलब्ध केले जात आहेत.

नागरिक, व्यावसायिक आणि प्रशासनाला होणारे प्रमुख फायदे:

• वेळ आणि पैशांची बचत: नागरिकांना आपल्या भूखंडाच्या किंवा मालमत्तेच्या परिसरातील माहिती घेण्यासाठी वारंवार शासकीय कार्यालयाचे उंबरठे झिजवावे लागणार नाहीत.

• प्रशासनात पारदर्शकता: जमिनीशी संबंधित प्राथमिक नियोजन, रस्ते आणि बफर झोनची अधिकृत व अचूक माहिती तात्काळ उपलब्ध झाल्यामुळे फसवणुकीचे प्रमाण कमी होईल.

• विकास आराखडा तयार करणे सोपे: वास्तुविशारद, अभियंते आणि विकासकांना नवीन बांधकाम किंवा विकास प्रस्ताव तयार करताना आवश्यक असणारी प्राथमिक माहिती एका क्लिकवर उपलब्ध होईल.

• डिजिटल गव्हर्नन्सला चालना: विविध शासकीय विभागांमध्ये समन्वय साधणे आणि डेटावर आधारित निर्णय घेणे यामुळे अत्यंत सुलभ होणार आहे.

"नागरिकांना त्यांच्या भूखंडाच्या परिसरातील रस्ते, पूररेषा आणि प्रादेशिक नियोजनाची माहिती घरबसल्या मिळण्यासाठी हे पोर्टल अत्यंत महत्त्वाचे पाऊल आहे. डिजिटल गव्हर्नन्सद्वारे पारदर्शक administration (प्रशासन) देण्यासाठी पीएमआरडीए कटिबद्ध आहे."

— डॉ. अभिजित चौधरी (महानगर आयुक्त, पीएमआरडीए)