अमरावती: बंद कारमध्ये मिळून आला प्रॉपर्टी ब्रोकर्सचा मृतदेह; गेल्या तीन दिवसांपासून होते बेपत्ता

अमरावती: नागपूर महामार्गावरील अर्जुन नगर बसस्टॉपजवळ एका बंद कारमध्ये ४० वर्षीय इसमाचा मृतदेह आढळून आल्याने परिसरात एकच खळबळ उडाली. सोमवारी सकाळी १०.३० वाजण्याच्या सुमारास उघडकीस आलेल्या या घटनेने मृताच्या कुटुंबीयांवर दुःखाचा डोंगर कोसळला आहे. विशेष म्हणजे, काही तासांपूर्वीच 'घरी पोहोचतोय, असे आपल्या पत्नीला सांगणारे विरल सुनील जसापारा (रा. बुटी प्लॉट, राजापेठ) हे आपल्याच कारमध्ये मृतावस्थेत आढळल्याने हळहळ व्यक्त होत आहे.

माहितीनुसार, विरल जसापारा हे व्यवसायाने प्रॉपर्टी ब्रोकर होते. ते चार पाच दिवसांपासून घराबाहेर होते. मात्र, ते यापूर्वीदेखील व्यवसायाच्या निमित्ताने अशाच प्रकारे काही काळ घराबाहेर राहत असल्यामुळे कुटुंबीयांना कोणतीही संशय आला नाही. ते लवकरच घरी परततील, या प्रतीक्षेत त्यांचे कुटुंब होते.

दरम्यान, सोमवारी सकाळी अर्जुन नगर बसस्टॉप परिसरात एक कार दोन-तीन तासांपासून उभी असून त्यातील व्यक्तीची कोणतीही हालचाल होत नसल्याचे काही नागरिकांच्या निदर्शनास आले. त्यांनी तत्काळ याची माहिती गाडगे नगर पोलिसांना दिली. माहिती मिळताच डीसीपी यशवंत सोळंके, गाडगे नगरचे ठाणेदार गोरखनाथ जाधव यांच्यासह गुन्हे शाखेचे पथक घटनास्थळी दाखल झाले.

दार तोडून काढला मृतदेह
कार आतून बंद असल्याने पोलिसांनी अथक प्रयत्न करून व कारचे दार तोडून मृतदेह बाहेर काढला. यावेळी विरल यांचा मृतदेह पालथ्या स्थितीत आढळला तसेच कारमध्ये विदेशी दारूच्या तीन बाटल्यादेखील आढळल्या.

'फोन कॉल' ठरला शेवटचा
त्यांच्या पत्नीला पोलिसांनी फोन करून या दुर्घटनेची माहिती दिली. पोलिसांनी फोन केल्यानंतर काही तासांपूर्वीच 'मी घरी पोहोचतोच आहे, असा विरल यांचा फोन आला होता, अशी माहिती त्यांच्या पत्नीने पोलिसांना दिली.