अमरावती: बापट चौकात मध्यरात्री रक्ताचा थरार; तरुणाची निर्घृण हत्या, शहरात एकच खळबळ

अमरावतीः शहरातील बापट चौक परिसरात रविवारी उशिरा रात्री एका युवकाची हत्या करण्यात आली आहे. मृत युवकाची ओळख शरीफ बेग रशीद बेग (वय २५, रा. लालखडी) अशी झाली आहे. अज्ञात हल्लेखोरांनी त्याच्यावर धारदार शस्त्राने सपासप वार केले, ज्यामुळे तो गंभीर जखमी झाला. त्याला तात्काळ उपचारासाठी रुग्णालयात दाखल केले असता, उपचारादरम्यान त्याचा मृत्यू झाला.

घटनेची माहिती मिळताच शहर कोतवाली पोलीस आणि गुन्हे शाखेचे पथक तात्काळ घटनास्थळी दाखल झाले. पोलिसांनी सीसीटीव्ही फुटेज, तांत्रिक तपास आणि स्थानिकांकडून मिळालेल्या माहितीच्या आधारे अवघ्या दोन तासांत मोठी कारवाई करत दोन संशयित आरोपींना जेरबंद केले आहे.

डीबी पथकाने इरफान खान जावेद खान याला ताब्यात घेतले आहे, तर गुन्हे शाखेच्या पथकाने शेख रेहान शेख हारून याला ताब्यात घेतले आहे. सध्या पोलिसांनी दोन्ही संशयितांची कसून चौकशी सुरू केली असून, हत्येमागील नेमके कारण आणि इतर संबंधित बाबींचा तपास सुरू आहे. मृतदेह शवविच्छेदनासाठी पाठवण्यात आला असून, या तपासामध्ये आणखी महत्त्वाचे धागेदोरे समोर येण्याची शक्यता पोलिसांनी व्यक्त केली आहे.

Disclaimer: या पोस्टमधील माहिती उपलब्ध वृत्तस्रोत व अधिकृत माहितीनुसार प्रकाशित करण्यात आली आहे. तपास किंवा अधिकृत प्रक्रियेनुसार तथ्यांमध्ये बदल होऊ शकतो.
या पोस्टचा उद्देश केवळ माहिती देणे असून अंतिम सत्यता संबंधित शासकीय यंत्रणा व न्यायालयीन प्रक्रियेवर अवलंबून आहे.