पुणे: जेसीबीखाली चिरडलेल्या मजुराचा मृतदेह डिकीत कोंबून रस्त्यावर फेकला; 'अपघाताचा' बनाव उघड

पुणे: जिल्ह्यातील दौंड तालुक्यातील खामगाव (गाडीमोड) येथील एका गुऱ्हाळावर घडलेल्या एका भीषण घटनेने संपूर्ण राज्य हादरले आहे. एका २३ वर्षीय मजुराचा जेसीबीखाली चिरडून मृत्यू झाल्यानंतर, हा गुन्हा दडपण्यासाठी आरोपींनी रचलेला कट यवत पोलिसांच्या तपासात उघड झाला आहे.

नेमकी घटना काय? मृत मजुराचे नाव रामू शंभू पासी (वय २३, रा. सीतापूर, उत्तर प्रदेश) असे आहे. १९ जूनच्या मध्यरात्री १:३० च्या सुमारास खामगाव येथील गुऱ्हाळावर जेसीबीचे काम सुरू होते. यावेळी जेसीबी चालक आलम याने निष्काळजीपणे गाडी चालवल्याने, तिथे गाढ झोपेत असलेल्या रामू पासीच्या अंगावरून जेसीबीचे जड चाक गेले. यात रामूचा जागीच मृत्यू झाला.

पुरावे नष्ट करण्याचा भयानक कट: घटनेनंतर भीतीपोटी आणि कायदेशीर कारवाई टाळण्यासाठी, जेसीबी मालक अविनाश यादव याने तिथे उपस्थित असलेल्या इतर मजुरांना "हे कोणालाही सांगू नका, अन्यथा जीवे मारून टाकीन," अशी धमकी दिली. त्यानंतर सर्व आरोपींनी संगनमत करून रामूचा मृतदेह एका कारच्या डिकीत कोंबला. पहाटेच्या अंधारात हा मृतदेह वाघोली-राहू रस्त्यावर नेऊन टाकला, जेणेकरून त्याचा मृत्यू हा 'रस्ते अपघातात' झाला असल्याचे भासवता येईल.

 

भावाच्या जिद्दीमुळे पाप उघड: ठेकेदाराने रामू बेपत्ता झाल्याचा निरोप त्याच्या कुटुंबीयांना दिला होता. परंतु, रामूचा भाऊ राजू पासी याने उत्तर प्रदेशातून दौंडमध्ये येऊन दोन दिवस शोध घेतला. २१ जून रोजी गुऱ्हाळावर जाऊन त्याने कडक चौकशी केली असता आणि यवत पोलिसांत धाव घेतली असता, पोलिसांनी खाक्या दाखवताच आरोपींनी आपला गुन्हा कबूल केला.

कोणावर कारवाई? यवत पोलिसांनी जेसीबी चालक आलम, मालक अविनाश बाळासाहेब यादव, गणेश हरिभाऊ जगताप, कल्लू ऊर्फ प्रधान इस्तकार आणि इतर पाच जणांविरोधात विविध कलमान्वये गुन्हा दाखल केला आहे. या अमानवीय कृत्यामुळे परिसरात संतापाची लाट पसरली आहे.