पुणे: पहाटेच गोळीबाराचा थरार! वानवडीत पोलीस-गुन्हेगारात चकमक; ३० गुन्हे असलेला सराईत करण सिंग जखमी.

पुणे: वानवडीत पोलीस-गुन्हेगारात थरारक चकमक; सराईत गुन्हेगार करण सिंग पोलिसांच्या गोळीबारात जखमीपुण्यातील वानवडी परिसरात आज, रविवारी पहाटेच्या सुमारास पोलीस आणि एका सराईत गुन्हेगारादरम्यान गोळीबाराची थरारक घटना घडली. या चकमकीत ३० पेक्षा जास्त गंभीर गुन्हे दाखल असलेला सराईत गुन्हेगार 'करण सिंग' जखमी झाला असून, त्याला उपचारासाठी पुण्यातील ससून रुग्णालयात दाखल करण्यात आले आहे.

नेमकी घटना काय? वानवडी परिसरात एक सराईत गुन्हेगार येणार असल्याची गुप्त माहिती पोलिसांना मिळाली होती. या माहितीच्या आधारे वानवडी पोलिसांनी पहाटे ५:३० ते ६:०० च्या सुमारास परिसरात सापळा रचला होता. संशयित करण सिंग दिसताच त्याला पकडण्यासाठी पोलिसांनी धाव घेतली. मात्र, स्वतःला पोलिसांच्या विळख्यात अडकलेले पाहून, आरोपीने आपल्याजवळील बंदुकीतून पोलिसांच्या दिशेने थेट गोळीबार करण्यास सुरुवात केली.

 

स्वसंरक्षणार्थ पोलिसांचे प्रत्युत्तरआरोपीने अचानक केलेल्या या हल्ल्यामुळे परिस्थितीचे गांभीर्य ओळखून पोलिसांनी तत्काळ पवित्रा घेतला. स्वतःचा जीव वाचवण्यासाठी आणि गुन्हेगाराला रोखण्यासाठी पोलीस अधिकाऱ्याने स्वसंरक्षणार्थ प्रत्युत्तरादाखल गोळी झाडली. या चकमकीत करण सिंग याला गोळी लागल्याने तो जखमी झाला. या झटापटीत एक पोलीस अधिकारीही किरकोळ जखमी झाल्याचे वृत्त आहे.

घटनेनंतर पोलिसांनी जखमी आरोपीला तात्काळ ताब्यात घेऊन पुढील उपचारासाठी ससून रुग्णालयात हलवले आहे. या घटनेमुळे वानवडी परिसरात खळबळ उडाली असून, सराईत गुन्हेगाराची इतकी हिंमत कशी झाली, असा प्रश्न उपस्थित केला जात आहे. पोलीस पुढील तपास करत आहेत.