विठूभक्तांसाठी सरकारचं मोठं गिफ्ट! आषाढी वारीसाठी पंढरपूरला धावणार ५,५०० विशेष एसटी बसेस; ज्येष्ठ नागरिकांना मोफत तर महिलांना ५०% सवलत

मुंबई: आषाढी एकादशी यात्रेनिमित्त श्रीक्षेत्र पंढरपूरच्या दिशेने निघालेल्या लाखो विठ्ठलभक्तांच्या आणि वारकऱ्यांच्या सेवेसाठी महाराष्ट्र राज्य मार्ग परिवहन महामंडळ (MSRTC) यंदाही पूर्ण ताकदीने सज्ज झाले आहे. भाविकांचा प्रवास सुरक्षित, सुलभ आणि सुखकर व्हावा या उद्देशाने एसटी महामंडळाने राज्यभरातून तब्बल ५ हजार ५०० विशेष बसेस सोडण्याचे भव्य नियोजन केले आहे. या संदर्भातील महत्त्वाची माहिती राज्याचे परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली आहे.

गावातून थेट पंढरपूर बससेवा आणि विशेष सवलती

मंत्री प्रताप सरनाईक यांनी जाहीर केले की, राज्यातील कोणत्याही गावातून जर ४० किंवा त्यापेक्षा अधिक भाविकांनी एकत्रित मागणी केली, तर थेट त्या गावातून पंढरपूरसाठी विशेष एसटी बस उपलब्ध करून दिली जाईल. वारकऱ्यांनी यासाठी आपल्या जवळच्या एसटी आगाराशी (Depot) संपर्क साधून नोंदणी करण्याचे आवाहन करण्यात आले आहे.

या विशेष बस फेऱ्यांमध्येही शासनाच्या सर्व प्रवासी सवलती नेहमीप्रमाणे लागू राहतील:

• ७५ वर्षांवरील ज्येष्ठ नागरिक: 'अमृत ज्येष्ठ नागरिक योजना' अंतर्गत पूर्णपणे मोफत प्रवास.

• महिला प्रवाशी: 'महिला सन्मान योजना' अंतर्गत तिकीट दरात ५० टक्के विशेष सवलत.

चार तात्पुरती बस स्थानके आणि कडक नियोजन

आषाढी वारीदरम्यान पंढरपूर येथे होणारी गर्दी लक्षात घेता प्रशासनाने शहरात चार तात्पुरती बस स्थानके उभारण्याचा निर्णय घेतला आहे:

१. चंद्रभागा बस स्थानक

२. भीमा बस स्थानक (देगाव)

३. विठ्ठल कारखाना यात्रा स्थानक

४. पांडुरंग बस स्थानक (आयटीआय महाविद्यालय)

या तात्पुरत्या स्थानकांवर पिण्याचे शुद्ध पाणी, सुलभ शौचालय, संगणकीय आरक्षण केंद्र, चौकशी कक्ष आणि मार्गदर्शन फलक अशा सर्व आवश्यक सुविधा पुरवल्या जाणार आहेत. तसेच, एकादशीच्या दिवशी परतीच्या प्रवासाची कोंडी टाळण्यासाठी ३६ हून अधिक वाहतूक नियंत्रक आणि सुरक्षा रक्षक स्थानिक पोलिसांच्या समन्वयाने वाहतूक व्यवस्था सांभाळणार आहेत.

कर्मचाऱ्यांसाठी मोफत भोजनाची व्यवस्था

"वारकऱ्यांची सेवा हीच विठ्ठलाची सेवा" या भावनेने अहोरात्र रात्रंदिवस कर्तव्य बजावणारे चालक, वाहक, यांत्रिक कर्मचारी आणि पर्यवेक्षक अशा सुमारे १३ हजार कर्मचाऱ्यांसाठी मंत्री प्रताप सरनाईक यांनी स्वतःच्या खर्चाने चहा, नाश्ता आणि भोजनाची उत्तम व्यवस्था केली आहे. मागील वर्षी एसटीने ५,२०० बसेसद्वारे २१ लाख ९५ हजार भाविकांना सेवा दिली होती, यंदा ५,५०० बसेससह हे नियोजन अधिक सक्षम करण्यात आले आहे.

 

सविस्तर वाचा, लिंक कमेंट मध्ये https://punenews24.in/