वेरूळ शिक्षक मृत्यू प्रकरण: खाकीचा माज उतरला! PSI नागरगोजे निलंबित आणि अटकेत; आरोपींची संख्या ८ वर.

छत्रपती संभाजीनगर: राज्यभरात खळबळ उडवून देणाऱ्या वेरूळ येथील जिल्हा परिषद शिक्षक सुरेश रूपचंद बोरसे यांच्या मृत्यू प्रकरणात मोठी कारवाई झाली आहे. कायद्याचे रक्षकच भक्षक बनल्याचे सिद्ध झाल्याने पोलीस अधीक्षक प्रकाश जाधव यांनी वैजापूर पोलीस ठाण्याचे फौजदार (PSI) एकनाथ विश्वनाथ नागरगोजे आणि अंमलदार वाल्मीक बनगे यांना तात्काळ निलंबित केले आहे. यानंतर स्थानिक गुन्हे शाखेने मुख्य सूत्रधार उपनिरीक्षक नागरगोजे याला अटक केली आहे. या प्रकरणातील आरोपींची एकूण संख्या आता ८ वर पोहोचली आहे.

नेमकी घटना काय? १० जून रोजी रात्रीच्या वेळी वैजापूर पोलीस ठाण्याचे पथक आरोपींच्या शोधात वेरूळ गावात आले होते. यादरम्यान हे पथक मध्यरात्री नागरिकांचे दरवाजे जोरात वाजवत होते. आपल्या मुलांसाठी आईस्क्रीम आणण्यासाठी घराबाहेर पडलेले शिक्षक सुरेश बोरसे यांनी या पथकाला हटकले आणि "एवढ्या रात्री कोणाचे दरवाजे वाजवता आणि तुम्ही कोण आहात?" असा प्रश्न विचारत ओळखपत्र (ID Card) मागितले.

मारहाण आणि मृत्यू: ओळखपत्र मागितल्याचा राग अनावर झाल्यामुळे फौजदार नागरगोजे आणि त्यांच्यासोबत असलेल्या खाजगी व्यक्तींनी बोरसे यांना बळजबरीने गाडीत कोंबले आणि बेदम मारहाण केली. कुटुंबातील महिलांनी त्यांना सोडवण्याचा प्रयत्न केला असता, त्यांनाही खोट्या गुन्ह्यात अडकविण्याची धमकी देण्यात आली. या अमानुष मारहाणीतच शिक्षक सुरेश बोरसे यांचा मृत्यू झाला.

सध्याची स्थिती: या घटनेनंतर शिक्षक संघटना आणि स्थानिक नागरिक आक्रमक झाले होते. पोलीस प्रशासनाने या प्रकरणाची गंभीर दखल घेत मुख्य आरोपी असलेल्या पोलीस उपनिरीक्षकाला अटक केली आहे. या कारवाईमुळे पोलीस दलात खळबळ उडाली असून, कायदा हातात घेणाऱ्या कोणाचीही गय केली जाणार नाही, असा संदेश प्रशासनाने दिला आहे.