विद्यार्थ्यांच्या भवितव्याशी खेळ! जेईई निकालानंतर 'मोटेगावकर क्लास'ची संतापजनक जाहिरात; "मुलांचे नुकसान होणार नाही, दुसऱ्या क्लासमध्ये विलीन करू"

पुणे : नीट (NEET) पेपरफुटी प्रकरणात संचालक प्रा. शिवराज मोटेगावकर यांच्या अटकेनंतर आणि पुण्यात क्लासच्या बेकायदेशीर इमारतीवर महापालिकेने कारवाईचा बडगा उगारल्यानंतर आता 'आर.सी.सी. मोटेगावकर क्लासेस'ने (RCC Motegaonkar Classes) सोशल मीडियावर एक नवी जाहिरातबाजी सुरू केली आहे. नुकत्याच जाहीर झालेल्या जेईई (JEE) परीक्षांच्या निकालानंतर क्लासने सोशल मीडियावर पोस्ट शेअर करत, "मुलांचे शैक्षणिक नुकसान होणार नाही, आम्ही त्यांना दुसऱ्या क्लासमध्ये विलीन (Merge) करू," असा अजब दावा केला आहे. पुण्यात कोट्यवधी रुपयांची उलाढाल करणाऱ्या या नामांकित क्लासेसकडे विद्यार्थ्यांच्या भवितव्याबाबत कोणतेही गांभीर्य नसल्याचे यावरून स्पष्ट होत असून यामुळे पालकांमध्ये संतापाची लाट उसळती आहे.

नेमका प्रकार काय? नीट पेपर लीक प्रकरणामध्ये सीबीआयने (CBI) मोटेगावकर क्लासेसचे प्रमुख शिवराज मोटेगावकर यांना अटक करून दिल्लीला नेले आहे. याशिवाय, पुण्याच्या डेक्कन जिमखाना परिसरातील ज्या इमारतीमध्ये हा क्लास चालवला जात होता, ती इमारत 'भोगवटा पत्र' (Occupancy Certificate) नसताना गेल्या चार वर्षांपासून बेकायदेशीरपणे वापरली जात असल्याचे उघड झाले आहे. पुणे महापालिकेने या इमारतीला तब्बल ३ कोटी २० लाखांचा मिळकत कर लावत इमारत सील करण्याची कारवाई सुरू केली आहे.

मुख्य संचालक तुरुंगात असल्याने आणि पुण्यातील इमारत सील होण्याच्या मार्गावर असल्याने इथे प्रवेश घेतलेल्या हजारो विद्यार्थ्यांचे आणि त्यांच्या पालकांचे धाबे दणाणले आहेत. लाखो रुपयांची फी भरून मुलांचे भविष्य अंधारात पाहावे लागत असल्याने पालक प्रचंड चिंतेत आहेत.

जाहिरातीमुळे पालकांचा संताप अनावर अशा कठीण परिस्थितीत पालकांना धीर देण्याऐवजी किंवा फी परत करण्याबाबत बोलण्याऐवजी, मोटेगावकर क्लासकडून सोशल मीडियावर अत्यंत व्यावसायिक पद्धतीने जाहिरातबाजी केली जात आहे. "आम्ही विद्यार्थ्यांचे नुकसान होऊ देणार नाही, त्यांना सुरक्षितपणे दुसऱ्या क्लासच्या बॅचमध्ये वर्ग (Merge) केले जाईल," असे मेसेज फिरवले जात आहेत.

या संतापजनक भूमिकेमुळे पालकांनी तीव्र नाराजी व्यक्त केली आहे. "आम्ही मोटेगावकर क्लासच्या नावावर आणि विश्वासावर लाखो रुपये भरले होते, मग आता आमच्या मुलांना दुसऱ्या कोणत्यातरी अनोळखी क्लासमध्ये का पाठवायचे? आमच्या पैशांचे आणि मुलांच्या मानसिक स्थितीचे काय?" असा संतप्त सवाल पालक विचारत आहेत. यावरून शैक्षणिक संस्थांचा नफेखोर आणि बेजबाबदार चेहरा पुन्हा एकदा समोर आला असून अशा संस्थांवर प्रशासनाने कडक कायदेशीर आणि दंडात्मक कारवाई करत विद्यार्थ्यांचे पैसे सुरक्षित ठेवावेत, अशी मागणी जोर धरत आहे.