Naigaon : तब्बल 1000 कोटींचा जमीन घोटाळा उघड; बनावट कागदपत्रांच्या आधारे फसवणूक, शासकीय अधिकाऱ्यांसह चौघांवर गुन्हा दाखल, नेमकं काय घडलं?

Vasai : बनावट कागदपत्रे आणि अधिकारांचा गैरवापर करून तब्बल एक हजार कोटी रुपयांहून अधिक मूल्याच्या जमिनीचा घोटाळा नायगावच्या टिवरी परिसरात उघडकीस आला आहे. याप्रकरणी, महसूल विभागातील अधिकाऱ्यांसह चार जणांवर नायगाव पोलिस ठाण्यात बुधवारी गुन्हा दाखल करण्यात आला आहे. पोलिसांनी या प्रकरणी दोघांना अटक केली आहे.

मुंबईतील धनश्री डेव्हलपर्स प्रा. लि कंपनीचे संचालक आणि प्रसिद्ध बांधकाम व्यावसायिक शंकरराव बोरकर (६६) यांनी या प्रकरणी तक्रार दिली आहे. हेमंत पाटील आणि धर्मेश शहा यांनी २००८ पासून आपला विश्वास संपादन केला होता. मात्र, नायगाव येथील मौजे टिवरी येथील ६५.३३ एकर जमीन त्यांनी बनावट कागदपत्रे तयार करून बेकायदा विकली, असा आरोप तक्रारीत करण्यात आला आहे. बोरकर यांनी दिलेल्या तक्रारीनुसार, जमिनीचे रितसर सात-बारा उतारे, नोंदणीकृत खरेदीखत आणि साठेकरार अस्तित्वात होते. कालबाह्य आणि रद्द झालेले मुखत्यारपत्र वापर वापरून तसेच बिगर-नोंदणीकृत कागदपत्रांआधारे अनेक सर्वे नंबरच्या जमिनी परस्पर विकल्याचे तक्रारीत म्हटले आहे.

Solapur : शहरात नावाजलेला व्यवसाय, मोठी प्रतिष्ठा; तरीही उद्योजकाने १७व्या मजल्यावरून उडी मारून आयुष्य संपवलं, नेमकं कारण काय?

बोरकर यांच्या संमतीशिवाय डीडीपीएल ग्लोबल प्रा. लि. आणि युनिकॉर्न इंका अँड इस्टेट प्रा. लि. या कंपन्यांच्या नावावर जमिनीची खोटी नोंदणी करण्यात आली. या घोटाळ्यात केवळ खासगी व्यक्तीच नव्हे, तर सरकारी यंत्रणेवरही ठपका ठेवण्यात आला आहे. वसई-२ निबंधक कार्यालयातील तत्कालीन अधिकारी, तहसीलदार आणि तलाठ्यांनी महसुली नियमांचे उल्लंघन करून आरोपींना मदत केल्याचा गंभीर आरोप तक्रारीत करण्यात आला आहे.

या प्रकरणी बुधवारी नायगाव पोलिस ठाण्यात हेमंत पाटील, धर्मेश शहा, दीपक खोचरे, मच्छिंद्र भोईर आणि त्यांच्या इतर साथीदारांविरुद्ध गुन्हा दाखल करण्यात आला आहे. पोलिस आयुक्त कार्यालयाच्या आदेशानुसार, या प्रकरणाचा तपास आता गुन्हे शाखेच्या खंडणीविरोधी पथकाकडे सोपवण्यात आल्याचे पोलिसांनी सांगितले.