Mumbai : मुंबई हादरली! तरुणीला रस्त्यात मारहाण, घटनेचा CCTV व्हिडिओ व्हायरल

Mumbai : मुंबईच्या दहिसर पश्चिम परिसरातील नवागाव येथील शास्त्रीनगर शिवमंदिर परिसरात एका तरुणाने तरुणीला मारहाण केल्याची धक्कादायक घटना समोर आली आहे. या घटनेचे सीसीटीव्ही फुटेज सोशल मीडियावर व्हायरल झाल्यानंतर परिसरात संतापाची लाट उसळली आहे.

मिळालेल्या माहितीनुसार, दहिसर पश्चिम येथील एमएचबी पोलीस ठाण्याच्या हद्दीत ही घटना घडली. शास्त्रीनगर शिवमंदिरासमोर एका तरुणाने तरुणीला गाठून तिच्यावर लाथा-बुक्क्यांनी अमानुष मारहाण केल्याचे सीसीटीव्हीमध्ये स्पष्ट दिसत आहे. प्राथमिक माहितीनुसार, हा प्रकार प्रेमप्रकरणातून घडल्याचे समोर आले आहे.

घटनेचा संपूर्ण प्रकार परिसरातील सीसीटीव्ही कॅमेऱ्यात कैद झाला असून, हा व्हिडिओ सोशल मीडियावर झपाट्याने व्हायरल झाला आहे. त्यानंतर नागरिकांनी आरोपीवर कठोर कारवाई करण्याची मागणी केली होती.

आरोपी अवघ्या तासाभरात अटकेत

घटनेची माहिती मिळताच एमएचबी पोलिसांनी तात्काळ दखल घेतली. वरिष्ठ पोलीस निरीक्षक हरीश गवळी यांच्या मार्गदर्शनाखाली सीसीटीव्ही फुटेजच्या आधारे तपास सुरू करण्यात आला. अवघ्या एका तासाच्या आत पोलिसांनी आरोपीला शोधून अटक केली.

आरोपीचे नाव राहुल विलास पंडित (वय २८, रा. नवागाव) असे आहे. पुढील तपास सुरू असून कायदेशीर कारवाई केली जात असल्याचे पोलिसांनी सांगितले.

“सीसीटीव्ही फुटेजच्या आधारे तातडीने गुन्हा दाखल करून तपास सुरू केला आणि एका तासात आरोपीला अटक करण्यात आली. प्राथमिक तपासात हे कृत्य प्रेमप्रकरणातून झाल्याचे समोर आले आहे,” अशी माहिती पोलिसांकडून देण्यात आली आहे.