Pune : दोन कारचालकांत वाद; संतप्त महिलेने तरुणाला कारसमोर अडकवून तब्बल २ किमी फरफटत नेलं, पुण्यात धक्कादायक VIDEO समोर

Pune : पुण्यातील संगमवाडी येथे शनिवारी दि. 17 जानेवारी रोजी दुपारी साडेबाराच्या सुमारास एक संतापजनक प्रकार घडला. भरदिवसा घडलेल्या या घटनेनं रस्त्यावर एकच खळबळ उडाली. एका महिलेनं तरुण कारच्या बोनेटवर चढलेला असताना त्याला दोन किमीपर्यंत फरफटत नेल्याचा धक्कादायक प्रकार समोर आला आहे. या घटनेचा व्हिडीओ देखील सोशल मीडियावर व्हायरल झाला आहे. मिळालेल्या माहितीनुसार, एका महिला चालकाची कार आणि एका इनोव्हा चालक यांच्यात किरकोळ कारणावरून वाद झाला. हा वाद काही क्षणांतच गंभीर वळणावर गेला आणि अखेर तरुणावर जीव धोक्यात घालणारा प्रसंग ओढवला.

गाडी रस्त्यात लावली
पुण्यातील कल्याणीनगरकडून संगमवाडीच्या दिशेने येताना दोन्ही वाहन चालकांमध्ये वाद झाला. या वादादरम्यान इनोव्हा चालकाने आपली गाडी रस्त्यात आडवी लावून महिलेच्या कारला अडवण्याचा प्रयत्न केला. त्यामुळे वाहतुकीत अडथळा निर्माण झाला. दोन्ही चालकांमध्ये शाब्दिक वाद वाढला. संतप्त झालेल्या इनोव्हा चालकाने महिलेच्या कारसमोर उभे राहून तिला पुढे जाण्यापासून रोखण्याचा प्रयत्न केल्याचं प्रत्यक्षदर्शींनी सांगितलं.

ZP Election : महापालिका पराभवानंतर पवारांचा मोठा डाव; जिल्हा परिषद निवडणुकीसाठी महत्त्वाचा निर्णय घेतला

वाद चिघळल्यानंतर महिलेला संताप आला आणि तिनं कार न थांबवता पुढे दामटवली. याचवेळी इनोव्हा चालक थेट कारच्या बोनेटवर झोपला. धक्कादायक बाब म्हणजे, अशा अवस्थेतही तरुण कारच्या बोनेटवर अडकलेला होता. संबंधित महिला चालकानं सुमारे दोन किलोमीटर अंतरापर्यंत कार चालवत नेल्याची माहिती मिळाली आहे. या संपूर्ण घटनेदरम्यान तरुण बोनेटवर लटकलेला असल्यानं रस्त्यावरून जाणाऱ्या नागरिकांमध्ये भीतीचं वातावरण निर्माण झालं होतं.

घटनेचा व्हिडिओ व्हायरल
काही अंतरानंतर महिलेनं कारचे अचानक ब्रेक लावले आणि तो तरुण रस्त्यावर कोसळला. या अपघातात त्याला गंभीर दुखापत झाली. घटनेच्या वेळी VIP बंदोबस्तासाठी परिसरात तैनात असलेल्या पोलिसांनी तात्काळ परिस्थितीवर नियंत्रण मिळवलं. जखमी तरुणाला तातडीने जवळच्या रुग्णालयात दाखल करण्यात आलं. सध्या त्याच्यावर उपचार सुरू असून त्याची प्रकृती चांगली असल्याचं डॉक्टरांनी सांगितलं.

दरम्यान, या संतापजनक घटनेमुळे संगमवाडी रस्त्यावर काही काळ तणावाचं वातावरण दिसून आलं. नागरिकांची मोठी गर्दी जमली होती. पोलिसांनी घटनास्थळी पोहोचून वाहतूक सुरळीत केली. प्राथमिक चौकशीत हा प्रकार रस्त्यावरील वादातून घडल्याचं समोर आलं आहे. पोलिसांनी दोन्ही वाहनांची माहिती घेतली असून सीसीटीव्ही फुटेजच्या आधारे घटनेची सखोल चौकशी सुरू आहे. या प्रकरणात संबंधित महिलाचालक आणि जखमी तरुण यांची चौकशी केली जात आहे. कायद्याच्या चौकटीत पुढील कारवाई करण्यात येणार असल्याचं पोलिसांनी सांगितलं.