Pune Election Results : पुण्यात शिंदे गटाला मोठा धक्का; शिवसेनेचा सर्व जागांवर पराभव, नेमकं काय चुकलं?

Pune : पुण्याचा कारभारी बदलून ‘किंगमेकर’ होण्याचे स्वप्न पाहणाऱ्या उपमुख्यमंत्री एकनाथ शिंदे यांच्या शिवसेनेला पुण्यात एकही जागा मिळविता आली नाही. भारतीय जनता पक्षासमवेत महायुतीत १५ जागांची ‘ऑफर’ धुडकावून स्वबळावर ११९ शिवसैनिक निवडणुकीच्या रिंगणात उतरविणाऱ्या शिवसेनेला सर्व जागांवर पराभवाचा मोठा झटका बसला असून, ‘स्वबळा’चा नारा पथ्यावर पडण्याऐवजी फासच ठरल्याचे दिसले.

महापालिका निवडणुकांचे बिगुल वाजल्यानंतर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी महायुतीची घोषणा केली. पुणे महापालिका निवडणूक एकत्रित लढविण्याचा निर्णय दोन्ही पक्षांच्या शहर पदाधिकाऱ्यांच्या बैठकीत घेण्यात आला. शिवसेनेचे ‘इलेक्टिव्ह मेरिट’ लक्षात घेऊन भाजपने महापालिकेच्या १६५ जागांपैकी १६ जागा सोडण्याची तयारी दर्शवली. मात्र, शिवसेनेला २५ जागा हव्या होत्या.

PMC Election Results 2026 : खडकवासल्यात ‘कांटे की टक्कर’! भाजप–राष्ट्रवादीत जागांची बरोबरी; कुठे जल्लोष, तर कुठे अश्रू

शिवसेनेच्या पदाधिकाऱ्यांना अपेक्षित असलेल्या जागा सोडण्यास भाजपचा ठाम विरोध होता; तर भाजपकडून सन्मानजनक जागा दिल्या जात नसल्याचा रोष शिवसेनेचे पदाधिकारी व्यक्त करीत होते. परिणामी, महायुतीच्या जागावाटपाचा तिढा शेवटपर्यंत सुटला नाही. उमेदवारी अर्ज भरण्याची मुदत संपत असतानाच शिवसेनेने एबी फॉर्मची खिरापत वाटून ११९ उमेदवारांना लढण्यासाठी सज्ज केले. त्यानंतरही शिवसेनेचे नेते उदय सामंत यांच्याकडून महायुती अभेद्यच असल्याचे दावे केले जात होते; तर स्थानिक पदाधिकारी ‘राष्ट्रवादी काँग्रेस’समवेत जाण्याची चाचपणी करीत राहिले. अखेरीस शिवसेनेने एकूण ४१पैकी ३९ प्रभागांत आपले उमेदवार उभे केले. त्यात १५ प्रभागांमध्ये सेनेने संपूर्ण पॅनेल उतरविले.

पुण्याचा सर्वांगीण विकास आणि एकनाथ शिंदे यांनी मुख्यमंत्री पदावर असताना सुरू केलेल्या ‘मुख्यमंत्री माझी लाडकी बहीण’ योजनेच्या प्रचारावर सेनेच्या उमेदवारांनी मतांचा जोगवा मागितला. आक्रमक प्रचारासाठी प्रसिद्ध असलेल्या शिवसेनेच्या वरिष्ठ नेत्यांनी निवडणूक प्रचारात प्रतिस्पर्धी भाजप आणि राष्ट्रवादी काँग्रेसवर टीका करणे पूर्ण टाळले. उपमुख्यमंत्री एकनाथ शिंदे यांनी कात्रज आणि नाना पेठेत जाहीर सभा घेतल्या.

पुणे शहर गुन्हेगारीमुक्त, भ्रष्टाचारमुक्त, झोपडपट्टीमुक्त, वाहतूक कोंडीमुक्त करण्याचे आश्वासन देतानाच ‘पाण्याचे मीटर’ काढून फेकून देण्याची घोषणा केली. मंत्री उदय सामंत यांनी पदाधिकाऱ्यांचे मेळावे घेतले. नेत्या नीलम गोऱ्हे, गुलाबराव पाटील यांनीही सेनेच्या उमेदवारांच्या प्रचारार्थ सभा घेतल्या. मात्र, मतदारांनी मतपेटीतून ‘धनुष्यबाणा’ला पाठबळ दिले नाही. ‘लाडकी बहीण’चा करिष्माही पुण्यात चालला नाही. त्यामुळे पुण्याची राजकीय समज ही आर्थिक लाभापेक्षा स्थानिक नेतृत्व आणि पक्षीय बांधणीवर अधिक अवलंबून असल्याचे अधोरेखित झाले.

ही ठरली पराभवाची कारणे...
पक्षांतर्गत धुसफूस हेदेखील शिवसेनेच्या पराभवाचे मोठे कारण ठरले.
तिकीट वाटपावरून निष्ठावंत कार्यकत्यांनी पक्षाच्या पदाधिकाऱ्यांच्य निवासस्थानाबाहेर आंदोलने केली.
पक्षाच्या बैठकीत पदाधिकाऱ्यांमध्ये झालेल्या भांडणातून अंतर्गत वाद चव्हाट्यावर आले. निवडणूक प्रचारातही पदाधिकाऱ्यांची एकजूट दिसली नाही.
परिणामी पक्षाचे शहरप्रमुख प्रमोद उर्फ नाना भानगिरे यांना स्वतःची जागा राखता आली नाही. महानगरप्रमुख रवींद्र धंगेकर यांची पत्नी प्रतिभा आणि चिरंजीव प्रणव धंगेकर यांना पराभवाचा सामना करावा लागला.
निवडणुकीच्या तोंडावर धनुष्यबाण उचलणाऱ्या आबा बागूल यांना निकालात तिसऱ्या क्रमांकावर स्थान मिळाले.
एकंदरीतच पुण्याचा 'कारभारी' बदलायला निघालेल्या शिवसेनेला पुणेकरांनी 'पाहुण्या'चीच वागणूक दिली. या मानहानीकारक पराभवानंतर पक्षाचे प्रमुख नेते एकनाथ शिंदे पक्षाच्या शहर नेतृत्वात खांदेपालट करण्याची शक्यता आहे.