Baramati : बहिणीची छेड काढल्याबद्दल भावावर कोयत्याने हल्ला; बारामतीत खळबळ, वर्षभरानंतर प्रकरणात महत्त्वाचा टप्पा

Baramati : विद्या प्रतिष्ठान कॉलेज परिसरात मुलीची छेडछाड केल्याचा जाब विचारण्यासाठी गेलेल्या भावावर लोखंडी कडं आणि कोयत्याने प्राणघातक हल्ला करण्यात आला होता. या हल्लेनंतर आरोपी वर्षभर फरार होता. तब्बल एक वर्षापासून फरार असलेल्या सराईत गुन्हेगाराला अखेर बारामती तालुका पोलिसांनी अटक केली आहे. या कारवाईमुळे परिसरात दहशत माजवणाऱ्या आरोपींचे धाबे दणाणले आहेत.

15 जानेवारी रोजी घडलेल्या या संतापजनक घटनेत फिर्यादी आपल्या अल्पवयीन बहिणीची छेडछाड केल्याबाबत आरोपीला जाब विचारण्यासाठी विद्या प्रतिष्ठान कॉलेज परिसरात गेला होता. त्यावेळी आरोपींनी त्याला हातातील लोखंडी कडं आणि लोखंडी कोयत्याने मारहाण करून गंभीर जखमी केलं होतं. या प्रकारामुळे परिसरात मोठी खळबळ उडाली होती.

Nanded : मतदानावर प्रभाव टाकण्यासाठी पैशांचे आमिष; १०० मतदारांना बंदिस्त ठेवल्याचा आरोप, नांदेडमध्ये राजकीय खळबळ

या घटनेप्रकरणी बारामती तालुका पोलीस ठाण्यात बी.एन.एस कलम 118 (2), 115 (2), 74, 75, 78 तसंच बालकांचं लैंगिक अपराधापासून संरक्षण अधिनियम कलम 8 आणि 12 अंतर्गत गुन्हा दाखल करण्यात आला होता. या गुन्ह्यातील मुख्य आरोपी गौरव दिलीप टेंगले (रा. म्हसोबाचीवाडी, पणधरे, ता. बारामती, जि. पुणे) हा गेल्या एक वर्षापासून पोलिसांना गुंगारा देत फरार होता. मात्र गुन्ह्याचं गांभीर्य लक्षात घेऊन पोलीस निरीक्षक चंद्रशेखर यादव आणि त्यांच्या टीमने गुप्त माहितीच्या आधारे 19 डिसेंबर रोजी एमआयडीसी परिसरातून आरोपीला अटक करत त्याच्या मुसक्या आवळल्या.

धक्कादायक बाब म्हणजे अटक करण्यात आलेल्या आरोपीवर यापूर्वीही भिगवण पोलीस ठाणे, बारामती तालुका पोलीस ठाणे आणि बारामती शहर पोलीस ठाणे इथे गंभीर स्वरूपाचे अनेक गुन्हे दाखल असल्याचं समोर आलं आहे. त्यामुळे पोलीस त्याचा कसून शोध घेत होते. अखेर वर्षभरापासून फरार गुन्हेगाराला पोलिसांनी ताब्यात घेतलं. त्यांच्या या कारवाईमुळे महिलांवरील अत्याचार आणि गुन्हेगारी प्रवृत्तीविरोधात पोलिसांची भूमिका पुन्हा एकदा अधोरेखित झाली आहे.