Beed : साताऱ्यात आत्महत्या केलेल्या महिला डॉक्टरवर बीडमध्ये अंत्यसंस्कार; मूळ गावी ग्रामस्थांची गर्दी, कुटुंबीयांचा आक्रोश

Beed : साताऱ्यातील फलटण येथे आत्महत्या केलेल्या महिला डॉक्टरवर काल रात्री उशिरा बीड जिल्ह्यातील वडवणी तालुक्यातील कवडगाव येथे अंत्यसंस्कार करण्यात आले. फलटणहून वडवणी येथे रात्री उशिरा मृतदेह आणल्यानंतर शोकाकुल वातावरणात अंत्यविधी पार पडले. या वेळी ग्रामस्थांसह नातेवाईकांची मोठी गर्दी पाहायला मिळाली. आरोपींवर कठोरात कठोर कारवाई करण्यात यावी, अशी मागणी कुटुंबीयांनी केली. तरुणीला अखेरचा निरोप देताना ग्रामस्थ आणि नातेवाईकांचा आक्रोश ओसंडून वाहताना दिसला.

या प्रकरणात आरोपी प्रशांत बनकरला अटक करण्यात आली आहे, तर पोलिस उपनिरीक्षक गोपाल बदने अद्याप फरार असून त्याचा शोध सुरू आहे.

Satara : मृत डॉक्टरच्या नातेवाईकांचा गंभीर आरोप – 'शवविच्छेदन अहवाल बदलण्यासाठी वारंवार दबाव'; खासदाराचा सतत फोन

साताऱ्यातील फलटण येथील एका हॉटेलमध्ये गुरुवारी रात्री या महिला डॉक्टरने आत्महत्या केली होती. आत्महत्येपूर्वी तिने तळहातावर एका पोलिस उपनिरीक्षकाने केलेल्या शारीरिक आणि मानसिक छळाचा उल्लेख केला होता.

मुख्यमंत्री देवेंद्र फडणवीस यांनी या प्रकरणाची तातडीने दखल घेत पोलिस उपनिरीक्षक गोपाल बदने याला निलंबित करण्याचे आदेश दिले. तसेच तपास जलदगतीने होण्यासाठी विशेष पथक नेमण्यात आले आहे.

दरम्यान, १९ जून रोजी पीडित डॉक्टरने फलटण येथील उपविभागीय पोलिस उपअधीक्षकांना पत्राद्वारे आपल्या छळाबाबत तक्रार केली होती. त्या पत्रात तिने बदनेसह फलटण ग्रामीण पोलिस ठाण्यातील तीन अधिकाऱ्यांकडून मानसिक त्रास आणि दबाव टाकला जात असल्याचे स्पष्टपणे नमूद केले होते.

या घटनेची महाराष्ट्र राज्य महिला आयोगानेही गंभीर दखल घेतली आहे. “ही घटना अत्यंत खेदजनक असून महिलेच्या सन्मानावर घाला घालणारी आहे. आरोपींना कोणत्याही परिस्थितीत सोडले जाणार नाही,” असे आयोगाच्या अध्यक्षा रुपाली चाकणकर यांनी स्पष्ट केले आहे.