Pimpri : मावळमध्ये दुपारपर्यंत किती मतदान? मावळ ‘पॅटर्न’चे काय होणार?

महायुतीकडून राष्ट्रवादी (अजित पवार) पक्षाचे विद्यमान आमदार सुनील शेळके यांना त्यांच्याच पक्षाचे माजी प्रदेश उपाध्यक्ष बापू भेगडे यांनी अपक्ष आव्हान दिले आहे. भाजपच्या प्रमुख नेत्यांसह महाविकास आघाडीनेही भेगडे यांना पाठिंबा दिला आहे. त्यामुळे मावळातील लढत चुरशीची होत असून मावळ ‘पॅटर्न’ यशस्वी करण्याचे सर्वपक्षीयांपुढे आव्हान आहे. भेगडे यांच्यापेक्षा मावळ भाजपचीच प्रतिष्ठा पणाला लागली आहे. मावळकडे राज्याचे लक्ष लागले आहे.

मावळ विधानसभा मतदारसंघाचा बहुतेक भाग ग्रामीण आहे. बराचसा परिसर डोंगर-दर्‍यांचा दुर्गम असा आहे. तरीही शहरातील मतदारसंघाच्या तुलनेत मावळमधील मतदार अधिक सजग असल्याचे दिसून येत आहेत. या मतदारसंघात सर्वांत कमी मतदान २००९ मध्ये झाले होते. तेही ६५.४१ टक्के इतके होते. मावळ मतदारसंघात २०१४ आणि २०१९ मध्ये ७१ टक्क्यांपेक्षा अधिक मतदान झाले आहे. आता किती होते हे पाहणे महत्वाचे ठरणार आहे.

मावळमध्ये एकूण ३,८६,१७२ मतदार आहेत. पुरुष मतदार १,९७,४३६, महिला मतदार १,८८,७२३ तर तृतीयपंथी १३ मतदार आहेत. त्यापैकी १,३१,९५६ जणांनी मतदानाचा हक्क बजाविला आहे. ३४.१७ टक्के मतदान झाले आहे. यंदा मतदानाची टक्केवारी वाढण्याची शक्यता आहे.