Nashik News : नाशिकमध्ये मनाई आदेश: 15 दिवस 5 पेक्षा जास्त व्यक्तींना एकत्र येण्यास बंदी; नेमकं कारण काय?

नाशिकमध्ये २४ एप्रिल ते ०८ मे या कालावधीत ५ पेक्षा जास्त लोकं एकत्र येण्यासाठी पोलीस आयुक्तांची परवानगी आवश्यक आहे. विना परवानगी मोर्चे आणि आंदोलनांना मनाई करण्यात आली आहे. लोकसभा निवडणुकीची आदर्श आचासंहिता तसंच वेगवेगळ्या कारणांवरून कायदा आणि सुव्यवस्थेचा प्रश्न निर्माण होऊ नये, यासाठी निर्णय घेण्यात आला आहे.

२४ एप्रिल ते ०८ मे या कालावधीत पूर्वपरवानगी शिवाय पाच किंवा त्यापेक्षा जास्त नागरिकांना एकत्र जमण्यास मनाई आहे. सभा किंवा मिरवणूक काढण्यास बंदी घालण्यात आलेली आहे. प्रक्षोभक भाषण आणि वर्तवणूकीस देखील बंदी घालण्यात आलेली आहे.

राज्यातील विविध राजकीय पक्षांमध्ये फूट पडलेली आहे. त्यामुळे अनेकदा आरोप-प्रत्यारोप, सामाजिक आणि राजकीय प्रकरणांमुळे कायदा आणि सुव्यवस्थेचा प्रश्न निर्माण होण्याची शक्यता असते. याच पार्श्‍वभूमीवर शहरात शांतता कायम राहावी. कायदा आणि सुव्यवस्थेचा प्रश्न उद्‌भवू नये, यासाठी शहरात १५ दिवसांसाठी मनाई आदेश लागू केले आहेत.