Section 144 In Pune : पुणेकरांसाठी मोठी बातमी! शहरात १४४ कलम लागू, कारण काय?

पुणे पोलीस प्रशासनाकडून शहरातील कायदे, न्यायालयीन आदेशांची प्रभावी काटेकोरपणे अंमलबजावणी व्हावी म्हणून त्याअनुषंगाने सीआरपीसी कलम 144 प्रमाणे सुधारित निर्देश देण्यात आले आहेत. पुणे पोलीस प्रशासनाचे आदेश हे ३१ मार्च २०२४ पर्यंत १४४ लागू राहणार आहेत.

काही दिवसांपूर्वी पुणे पोलीस आयुक्त अमितेश कुमार यांनी पत्रकार परिषद घेऊन बार, पब्स रात्री दीड वाजल्यानंतर सुरू ठेवल्यास कठोर कारवाई करणार असल्याचे सांगितलं होतं. त्यानुसार पुण्यातील बार, पब्स, रेस्टॉरंट मालक आणि चालकांना कलम १४४ अंतर्गत आदेश दिले आहेत.

पुणे शहरातील हुक्का पार्लर बंद

पुणे शहरातील सर्व हुक्का पार्लर बंद करण्यात येत आहेत. पोलिसांकडून पब्स, रेस्टॉरंटमध्ये हुक्का सेवन आणि विक्री करण्यांवर कठोर कारवाई करण्यात येणार आहे. काही दिवसांपूर्वी पुणे पोलिसांनी तब्बल ४ कोटी रुपयांचे अंमली पदार्थ जप्त केले होते. या घटनेनंतर पुण्यात एकच खळबळ उडाली होती.

पुणे पोलीस अलर्ट मोडवर

पुणे शहरातील पोलीस ठाण्यात ५ वर्षांपेक्षा जास्त कार्यकाळ पूर्ण केलेल्या प्रत्येक पोलीस कर्मचाऱ्यांची बदली करण्यात येणार असल्याचीही माहिती पोलीस आयुक्तांनी दिली होती. पोलीस अधिकारी जर एकच ठिकाणी ३ वर्षांपासून असेल, त्याचा कार्यकाळ पूर्ण झाल्यानंतरही तिथेच असेल, तर त्याची सुद्धा बदली केली जाईल, असंही त्यांनी सांगितलं होतं. तसेच गुन्हेगारी प्रवृत्तीचे व्हिडिओ सोशल मीडियावर अपलोड करणाऱ्या ५० सोशल अकाउंटवर कारवाई केली आहे, अशी माहिती पुणे पोलीस आयुत्त अमितेश कुमार यांनी दिली होती.