Pune : अमनोरा पार्क परिसरातील बंद सदनिकेत आग

Pune : हडपसर भागातील अमनोरा पार्क परिसरातील एका सोसायटीत असलेल्या सदनिकेत रविवारी दुपारी आग लागली. सदनिका बंद असल्याने गंभीर दुर्घटना टळली. सदनिकेतील गृहोपयोगी साहित्य जळाले. अमनोरा पार्क परिसरात मागील बाजूस सॉलिटियर वाधवा अकरा मजली इमारत आहे. या इमारतीतील एका सदनिकेत आग लागल्याची माहिती रविवारी दुपारी अग्निशमन दलाला मिळाली. त्यानंतर अग्निशमन दलाच्या जवानांनी घटनास्थळी धाव घेतली.

इमारतीतील दुसऱ्या मजल्यावर असलेल्या सदनिका क्रमांक चारमध्ये आग लागल्याचे निदर्शनास आले. सदनिका बंद होती. या घटनेची माहिती सदनिका मालकाला कळविण्यात आली. चावीने दरवाजा उघडण्यात आला. तेव्हा सदनिकेत मोठ्या प्रमाणावर धूर झाल्याचे आढळून आले. सदनिकेत कोणी नसल्याची खात्री करून जवानांनी पाण्याचा मारा केला.

Pune Crime : मेफेड्रोन विक्रीतील पैसे हवालामार्गे दिल्लीत; पुणे पोलिसांची न्यायालयात माहिती

सदनिकेतील आगीची झळ शेजारी असलेल्या सदनिकेला न पोहोचण्यासाठी जवानांनी काळजी घेतली. अग्निशमन दलाचे अधिकारी अनिल गायकवाड यांच्या मार्गदर्शनाखाली तांडेल अंबादास दराडे, निलेश भोसले, चंद्रकांत जगताप, दत्तात्रय माने, प्रदीप सावंत, वैभव भोसले, अनिल हाके, घुले यांनी पाण्याचा मारा करून अर्ध्या तासात आग आटोक्यात आणली. आगीत सदनिकेतील गृहोपयोगी साहित्य जळाले. शॉर्टसर्किटमुळे आग लागल्याची शक्यता अग्निशमन दलाच्या जवानांनी व्यक्त केली.