Pune Crime : प्रेमसंबंधात अडथळा ठरत असल्याने त्याच्या खून; प्रेयसीसह पाच जणांना अटक

पुणे : सिंहगड रस्त्यावर शनिवारी रात्री झालेल्या विजय ढुमे खून प्रकरणाचा पोलिसांनी अवघ्या २४ तासांत छडा लावला आहे. ढुमेच्या खून प्रकरणी सिंहगड पोलिसांनी त्याच्या प्रेयसीसह पाच जणांना ताब्यात घेतले आहे. नवीन प्रेमसंबंधात अडथळा ठरत असल्याने ढुमेचा त्याच्या प्रेयसीने नवीन प्रियकराच्या मदतीने खून केल्याचे उघडकीस आले आहे.

सुजाता समीर ढमाल (रा. किरकटवाडी), संदीप दशरथ तुपे (वय २३, रा. राहू, इंदापूर), सागर संजय तुपसुंदर (वय १९ रा. सहकारनगर), प्रथमेश रामदास खंदारे (२८, उंड्री पिसोळी) आणि त्यांच्या एका अल्पवयीन साथीदारास ताब्यात घेण्यात आले आहे. क्वालिटी इन लॉजच्या परिसरात विजय ढुमे (वय ४४, रा. चिंचवड गाव) याचा सळईचे घाव घालून खून करण्यात आला होता.

Mumbai News : गुजराती व्यक्तीने बळकवला मराठी महिलेचा गाळा, मनसे पदाधिकारी मदतीला धावले

पोलिसांनी दिलेल्या माहितीनुसार, या गुन्ह्याच्या तपासासाठी सिंहगड पोलिसांनी दोन पथके तयार केली होती. संशयित आरोपींचा ६० ते ७० सीसीटीव्ही फुटेजचा आधार घेत माग काढण्यात आला.

सीसीटीव्ही फुटेज व तांत्रिक विश्‍लेषणाच्या आधारे आरोपींची नावे निष्पन्न करण्यात आली आहेत. तसेच ढुमेचे जुने प्रेमसंबंध असणारी महिला सुजाता हिच्याकडे देखील तपास करण्यात आला. तपासात तिने नवीन प्रियकर संदीप दशरथ तुपे याच्याबरोबर ढुमेचा खून करण्याचा कट रचल्याचे उघड झाले. त्यानंतर इतर आरोपींनाही ताब्यात घेण्यात आले. संदीप तुपे याच्यावर टेंभुर्णी, इंदापूर आणि हिंजवडी पोलिस ठाण्यात गंभीर स्वरूपाचे गुन्हे दाखल आहेत.

सहायक पोलिस निरीक्षक सचिन निकम, पोलिस उपनिरीक्षक गणेश मोकाशी, सहायक पोलिस फौजदार आबा उतेकर, सतीश नागूल, सुनील चिखले, हवालदार संजय शिंदे, देवा चव्हाण, अमोल पाटील, विकास बांदल, विकास पांडुळे, सागर शेडगे, अविनाश कांडे, राहुल ओलेकर, शिवाजी क्षिरसागर, स्वप्नील मगर आणि दक्ष पाटील यांच्या पथकाने ही कामगिरी केली. सोमवारी (ता.२) आरोपींना पोलिस कोठडीसाठी न्यायालयात हजर करण्यात येणार आहे.

१३ वर्षापासून ढुमेचे सुजाताबरोबर प्रेमसंबंध

लाईन बॉय असलेल्या ढुमे याचे पोलिस दलात तसेच शहरातील अनेक गुन्हेगारांशी जवळीक होती. गेल्या १३ वर्षापासून ढुमेचे सुजाताबरोबर प्रेमसंबंध होते. तिचे लग्न झाले आहे. सुजाताला बाउन्सरची नोकरी करायची होती. त्यासाठी तिचे प्रयत्न सुरू होते. चार महिन्यापूर्वी तिचे तुपेशी इन्स्टाग्रामवर ओळख झाली होती. वारंवार होत असलेला त्रास आणि नवीन प्रेमसंबंधात अडथळा ठरत असल्यामुळे सुजाताने नवीन प्रियकर तुपे याच्यासोबत ढुमेच्या खुनाचा कट रचला.