शिवाजीनगर-हिंजवडी मेट्रोसाठी नोकरभरती जाहिरात, मुलाखती बिहारमध्ये; मनसेकडून तीव्र आंदोलन

पुणे - शिवाजीनगर ते हिंजवडी या मार्गावरील मेट्रोसाठी आवश्‍यक कामगार भरतीची जाहिरात बिहारमधील वृत्तपत्रांमध्ये देत भुमीपुत्रांना रोजगारापासून वंचित ठेवत असल्याबद्दल महाराष्ट्र नवनिर्माण सेनेने मेट्रो प्रशासन व पुणे महानगर प्रदेश विकास प्राधिकरण (पीएमआरडीए) कार्यालयासमोर मंगळवारी आंदोलन केले. मनसेच्या पदाधिकारी व कार्यकर्त्यांनी प्रशासनाचा निषेध नोंदवून स्थानिक तरुणांना रोजगाराच्या संधी देण्याची मागणी मेट्रो, पीएमआरडीए प्रशासनाकडे केली.

शिवाजीनगर ते हिंजवडी मार्गावरील मेट्रोचे काम वेगात सुरु आहे. आगामी वर्षात हे काम पुर्ण होऊन मेट्रो सुरु होण्याची शक्‍यता आहे. दरम्यान, मेट्रो प्रशासनाने मेट्रोसाठी विविध पदांवर आवश्‍यक कुशल मनुष्यबळ घेण्यासाठी बिहारमधील काही वृत्तत्रांमध्ये जाहिरात प्रसिद्ध केल्याचा आरोप मनसेने केला आहे. पुण्यात मेट्रो प्रकल्प राबविताना त्यामध्ये भुमीपुत्रांना स्थानिक भुमीपुत्रांना रोजगार देणार असल्याचे राज्य सरकार व मेट्रो प्रशासनाने सांगितले होते.

प्रत्यक्षात जाहिरात मात्र बिहारमध्ये प्रसिद्ध केल्याबद्दल मनसेने संताप व्यक्त केला. मंगळवारी दुपारी मनसेच्यावतीने औंध येथील 'पीएमआरडीए'च्या कार्यालयासमोर तीव्र स्वरुपाचे आंदोलन केले. कार्यकर्त्यांनी मेट्रो व पीएमआरडीए प्रशासनाच्या विरोधात जोरदार घोषणा दिल्या. यावेळी मनसेचे शहराध्यक्ष साईनाथ बाबर, नेते राजेंद्र वागसरकर, विभागाध्यक्ष विनायक कोतकर यांच्यासह पदाधिकारी, कार्यकर्ते सहभागी होते. आंदोलनानंतर मनसेच्यावतीने अधिकाऱ्यांना आपल्या मागण्यांचे निवेदन देण्यात आले.

बाबर म्हणाले, 'महाराष्ट्रातील तरुणांमध्ये गुणवत्ता, क्षमता असतानाही पुणे मेट्रो प्रशासन मेट्रो भरती बिहार राज्यातुन कशाला ? स्थानिक तरुणांना रोजगार मिळावा, असा राज्य सरकारचा आदेश असताना मेट्रो प्रशासन बिहारमधील पाटणा येथे मुलाखती घेणार आहे. तेथे जाहिराती प्रसिद्ध केल्या जात आहेत. महाराष्ट्रातील भुमीपुत्रांच्या विरोधी भुमिकेचा मनसे निषेध करीत आहे. या भरतीची जाहिरात मराठी वृत्तपत्रात दिलेली नाही. बिहारमधील नोकरभरती तातडीने थांबवावी, पुणे मेट्रो भरतीमध्ये महाराष्ट्रातील भुमीपुत्रांचा अधिकार आहे. त्यामुळे त्यांना संधी द्या. मराठी वृत्तपत्रांमध्ये त्याबाबत जाहिराती प्रसिद्ध करा. तसे न केल्यास आणखी तीव्र स्वरुपाचे आंदोलन केले जाईल.'