Pune Crime News : धक्कादायक! कंपनी मालकाला धमकावून ५० लाखांच्या खंडणीची मागणी; चौघांना अटक

Pune Crime News : पुण्यात कंपनीतील तीन कामगारांनी साथीदारांच्या मदतीने मालकाला धमकावून ५० लाख रुपयांची खंडणी मागितल्याचा प्रकार उघडकीस आला आहे.या प्रकरणी भारती विद्यापीठ पोलिसांनी चार जणांना अटक केली आहे. 

याबाबत पोलिसांनी दिलेल्या माहितीनुसार, कात्रज महामार्गावरील एका स्कूलजवळ पाच-सहा जणांनी सहा मे रोजी कंपनीच्या मालकाची मोटार अडवून शिवीगाळ आणि मारहाण केली. तसेच १२ मे रोजी दुपारी दोन वाजण्याच्या सुमारास त्यांना मोबाईलवर व्हॉटसअप कॉल करुन ५० लाख रुपयांची खंडणीही मागितल्याचे समोर आले आहे.

धक्कादायक बाब म्हणजे खंडणी न दिल्यास फिर्यादी आणि कुटूंबियांना जीवे मारण्याची धमकीही दिली होती. या धक्कादायक प्रकाराने खळबळ उडाली असून या प्रकरणी भारती विद्यापीठ पोलिस ठाण्यात गुन्हा दाखल करून चार जणांना अटक केली आहे. 

सौरभ संजय बनसोडे (वय २१, रा. रामनगर, वारजे), पवन मधुकर कांबळे (वय २२, रा. धायरी), संकेत योगेश जाधव (वय २४, रा. नऱ्हे) आणि कृष्णा भीमराव भाबट (वय १९, रा. धायरी) अशी अटक केलेल्या संशयितांची नावे आहेत. पोलिस या घटनेचा अधिक तपास करत आहेत.