Pune : पुण्यात नोकरीसाठी आल्या, पण बुधवार पेठेत देहविक्रयात अडकल्या; चार महिलांची सुटका!

Pune : चांगली नोकरी मिळेल, हाताला काम लागेल आणि घरची परिस्थिती सुधारेल या आशेने चार बांगलादेशी महिला पुण्यात आल्या. कुणाला ब्युटी पार्लरमध्ये काम देतो, तर कुणाला शिवणकामाची नोकरी मिळवून देतो अशी आश्वासने या महिलांना देण्यात आली. परदेशात जाऊन काम मिळेल या विश्वासाने त्या महिलांनी होकार दिला. मात्र पुण्यात आल्यानंतर त्यांच्यासमोर वेगळंच वास्तव उभं राहिलं आणि त्यांना वेश्याव्यवसायात ढकलण्यात आल्याची माहिती समोर आली आहे.

पोलिसांच्या तपासात समोर आलेल्या माहितीनुसार, या महिलांना आधी बांगलादेशातून भारतात आणण्यात आलं. नोकरी, चांगला पगार आणि राहण्याची सोय असे अनेक आश्वासने त्यांना देण्यात आली होती. पण पुण्यात आल्यानंतर त्यांना बुधवार पेठेतील जनता बिल्डिंगमधील एका खोलीत ठेवण्यात आलं. हळूहळू त्यांना लक्षात आलं की त्यांना ज्या कामासाठी आणलं, ते काम वेगळंच आहे. त्यानंतर या महिलांना देहविक्रीसाठी ग्राहकांकडे पाठवलं जात असल्याची माहिती समोर आली. विरोध केला तर धमक्या दिल्या जात होत्या. काही दिवसांतच त्या पूर्णपणे या जाळ्यात अडकल्या. आरोपींनी त्यांचे मोबाईल आणि कागदपत्रे ताब्यात घेतली होती.

दरम्यान, झोन-१ चे डीसीपी ऋषिकेश रावळे यांना मिळालेल्या गोपनीय माहितीच्या आधारे ५ मार्च रोजी सायंकाळी साडेसहा ते रात्री साडेदहा दरम्यान बुधवार पेठेतील जनता बिल्डिंगच्या पहिल्या मजल्यावर छापा टाकण्यात आला. वरिष्ठ पोलिस निरीक्षक प्रशांत भास्मे यांच्या पथकाने ही कारवाई केली. छाप्यात चार बांगलादेशी महिला आणि एक पुरुष सापडला. त्यानंतर पोलिसांनी सगळ्यांची चौकशी सुरू केली.

या प्रकरणी बांगलादेशातील एका एजंटसह बाबू भैय्या उर्फ पापा शेख, भोपसिंग राजपूत आणि जागेची मालकीण मीनाक्षी रमेश मेत्री यांच्याविरोधात गुन्हा दाखल करण्यात आला आहे.