Pune : पुण्यातील नवीन मेट्रो मार्ग: कोंढवा ते येवलेवाडी, दक्षिण पुणेकरांचा प्रवास आता सुखकर

Pune : दक्षिण पुण्यातील कोंढवा आणि येवलेवाडी परिसरातील रहिवाशांना लवकरच मेट्रो मिळणार असल्यची शक्यता आहे. शिवाजीनगरपासून ते येवलेवाडीपर्यंत मेट्रोचा विस्तार करण्याच्या सध्या प्रस्ताव ठेवण्यात आला आहे. सर्व मंजुऱ्या आणि सर्वेक्षण वेळेत पूर्ण झालं तर 2030-31पर्यंत ही मेट्रो मार्गिका सुरू करण्याचं उद्दिष्ट आहे. महामेट्रोच्या अधिकाऱ्यांनी शिवाजीनगर ते येवलेवाडी अशी 20 किमी लांब उन्नत मार्गिका उभारण्याचं काम हाती घेतले असल्याची माहिती दिली.

कुठून-कसा असेल मार्ग?
हिंजवडी ते शिवजीनगर 23 किमी लांब मार्गिकेच्या विस्तारीकरणाचा हा एक भाग आहे. हिंजवडी - शिवाजीनगर मेट्रो सार्वजनिक-खासगी भागीदारी तत्त्वावर उभारली जात आहे. परंतु, कोंढवा ते येवलेनगर मेट्रोचं काम थेट महामेट्रोकडून करण्यात येणार आहे. या मार्गावर एक अतिरिक्त स्परद्वारे एनबीएम ते उंड्री विस्तारही होणार आहे. हिंजवडी ते शिवाजीनगर मेट्रोला कॅम्प आणि पुलगेट मार्गे जोडण्याचा प्रस्ताव आहे.

महामेट्रोचे संचालक अतुल गाडगीळ यांनी टाइम्स ऑफ इंडियाला दिलेल्या माहितीनुसार, सध्या प्रकल्प अहवाल तयार करण्यासाठी सल्लागारांची नियुक्ती करण्यात आली आहे. क्षेत्र सर्वेक्षणाचाही सध्या अभ्यास सुरू आहे. प्रस्तावित मार्ग शिवाजीनगर पासून जिल्हाधिकारी कार्यालयापर्यंत जोडून नंतर कॅम्प आणि पुलगेट मार्गे कोंढावा आणि येवलेवाडीकडे वाढवण्यात येणार आहे. तसेच प्रस्तावित स्पर लाइन ज्योती चौक ते एनआयबीएम जंक्शन आणि पुढे बिशप विद्यालयाजवळ उंड्रीपर्यंत नियोजित केला आहे. शिवाय या मार्गावर 1 किमी अंतरावर मेट्रो स्थानक उभारण्याचं सध्या नियोजन आहे.

कधी काम सुरू होणार?
या मार्गिकेसाठी सुमारे दोन महिन्यांपूर्वी सल्लागारांची नियुक्ती केली गेली होती. मे-जूनपर्यंत सविस्तर प्रकल्प अहवाल सादर होणे अपेक्षित असून सर्वेक्षण करून तो पुढील वर्षापर्यंत राज्याच्या मान्यते नंतर केंद्राकडे पाठवण्यात येणार आहे. पावसाळी अधिवेशनात आमदार योगेश टिळेकर यांनी कोंढला-येवलेवाडी मेट्रो मार्गाची मागणी केली होती. हडपसरपर्यंत मेट्रो मंजूर झाली असली तरी कोंढवा परिसरात मेट्रो नसल्याने नागरिकांना प्रवासात त्रास सहन करावा लागत आहे.

गेल्या वर्षी राज्य सरकारने पुण्यातील पूर्व आणि पश्चिम भागांमधील कनेकटीव्हीटी मजबूत करण्यासाठी एका नव्या मेट्रो मार्गिकेला मंजुरी दिली होती. खडकवासला, हडपसर, स्वारगेट आणि खराडी असा हा मार्ग ठरवण्यात आला आहे.