नागपुरात थरारक फिल्मी स्टाईल दरोडा; तुलसीनगरात सुरक्षारक्षक व चालकाला चाकूने भोसकून तब्बल ३ कोटी ७४ लाख रुपयांची रोकड असलेली कार पळवली!

उपराजधानी नागपूरमधून एक अत्यंत खळबळजनक आणि चक्रावून टाकणारी घटना समोर आली आहे. नागपूरच्या शांतनगर पोलिस ठाण्याच्या हद्दीतील तुलसीनगरात एका व्यावसायिकाच्या घरी तब्बल ३ कोटी ७४ लाख रुपयांची रोकड पळवण्यात आली आहे. घरातील कपाटातून पाच ते सहा बॅग्जमध्ये भरून ही अवाढव्य रोकड गाडीत ठेवताच, सशस्त्र दरोडेखोरांनी अत्यंत फिल्मी स्टाईलने हल्ला करत रोख रकमेची कारच पळवून नेल्याची घटना घडली. या थरारक घटनेमुळे नागपूर शहर पोलिस दल आणि गुन्हे शाखेत मोठी खळबळ उडाली असून, परिसरातील नागरिकांमध्ये दहशतीचे वातावरण निर्माण झाले आहे.

सुरक्षारक्षकावर चाकूने वार करून चालकाला धमकावले:

मिळालेल्या सविस्तर माहितीनुसार, मंगळवारी (ता. १७) मध्यरात्री दीड ते अडीच वाजण्याच्या सुमारास ही घटना घडली. संबंधित घरातून सुमारे ३ कोटी ७४ लाख रुपयांची रोकड पाच ते सहा बॅग्जमध्ये भरून ती गाडीत ठेवण्यात आली होती. ही गाडी रवाना होत असतानाच अचानक आलेल्या सशस्त्र लुटारूंनी तेथे धुमाकूळ घातला. घराच्या मुख्य प्रवेशद्वाराजवळ तैनात असलेल्या सुरक्षारक्षकाने या चोऱ्यांना विरोध करण्याचा प्रयत्न केला, तेव्हा संतापलेल्या हल्लेखोरांनी त्याच्यावर चाकूने निर्दयीपणे वार केले, ज्यामुळे सुरक्षारक्षक गंभीर जखमी झाला.

यादरम्यान, दरोडेखोरांनी कारचा चालक मोहन राव याच्या गळ्याला धारदार चाकू लावून त्याला जीवे मारण्याची धमकी दिली आणि बळजबरीने कारमधून खाली उतरवले. त्यानंतर लुटारू थेट ३ कोटी ७४ लाखांची रोकड असलेली ती कार घेऊन घटनास्थळावरून वेगाने पसार झाले.

कामठी-खैरी परिसरात कार सोडून आरोपी पसार, पोलिसांची चार पथके गठीत:

घटनेची माहिती मिळताच शांतिनगर पोलिसांनी तातडीने घटनास्थळी धाव घेत पाहणी केली आणि संपूर्ण शहरात नाकाबंदीचे आदेश दिले. तपासादरम्यान पोलिसांना नागपूर जिल्ह्यातील कामठी-खैरी (Kamptee-Khairi) परिसरामध्ये ती लुटलेली कार रस्त्याच्या कडेला लावारिस अवस्थेत असल्याचे आढळून आली. आरोपींनी कारमधील रोकड असलेली बॅग आणि रोقड लंपास करून गाडी तिथेच सोडून दिली होती. पोलिसांनी खैरी परिसरातून कार जप्त केली आहे.

एवढ्या मोठ्या प्रमाणातील रोकड (३ कोटी ७४ लाख रुपये) नेमकी कोणाची होती, ती कुठे नेली जात होती आणि तिचा मूळ स्रोत काय आहे, याविषयी आता उलटसुलट चर्चा सुरू असून हा व्यवहार हवाला व्यवहाराशी (Hawala Transaction) संबंधित असल्याचा प्राथमिक संशय व्यक्त केला जात आहे. मात्र, याबाबत पोलिसांकडून अद्याप अधिकृत दुजोरा देण्यात आलेला नाही. आरोपींना पैशांच्या वाहतुकीची आधीपासून माहिती होती का, त्यांनी आधीच रेकी केली होती का, या सर्व बाजूंनी तपास करण्यासाठी नागपूर पोलिसांची चार विशेष तपास पथके गठीत करण्यात आली असून, परिसरातील शेकडो सीसीटीव्ही कॅमेऱ्यांचे फुटेज कसून तपासले जात आहेत.

 



शहर

महाराष्ट्र

गुन्हा

राजकीय

विडियो गॅलेरी

देश विदेश

Leave a Reply

Your email address will not be published. Required fields are marked *