धक्कादायक! दोन दिवसात 10 कोटी दे, नाहीतर…बिश्नोई गँगची काँग्रेस आमदार साजिद खान यांना धमकी

विनोद जगदाळे /प्रतिनिधी: अकोल्यातील भाजप शहर अध्यक्षांना धमकावल्यानंतर आता अकोला पश्चिमचे काँग्रेस आमदार साजिद खान पठाण यांना बिश्नोई गँगने धमकी दिली आहे. शुभम लोणकर याने त्यांना गेम करण्याची, जीवे मारण्याची धमकी दिली आहे. अमेरिकेतील कॅलिफोर्निया येथून हा धमकीचा कॉल खान यांना आला. साजिद खान यांना 10 कोटी रुपयांची खंडणी मागण्यात आली. पैसे दिले नाही तर त्याचे परिणाम वाईट होतील अशी धमकी देण्यात आली. आमदार साजिद खान यांनी ही माहिती जिल्हा पोलीस अधिक्षकांना दिली. त्यांनी कॉले रेकॉर्डिंगही पोलिसांकडे दिले. तर त्याचवेळी त्यांनी शस्त्र परवान्यासाठी अर्जही सादर केला. बिश्नोई गँग आतापर्यंत बॉलिवूड सेलिब्रिटी आणि उद्योजकांच्या मागे लागली होती. मुंबईतील घटनांवरून ते समोर आले. शुभम लोणकर हा वऱ्हाडातील आहे आणि त्याचे बिश्नोई गँगशी लागेबंध असल्याचे समोर आले आहे. आता गँग राजकारण्यांनाही धमक्या (Akola Congress MLA Threaten by Lawrence Bishnoi Gang) देत असल्याने या घटनेमुळे एकच खळबळ उडाली आहे.

मुख्यमंत्री फडणवीस यांचा साजिद खान यांना थेट फोन

तर 16 फेब्रुवारी रोजी रात्री जवळपास 1:30 वाजता मुख्यमंत्री देवेंद्र फडणवीस यांनी साजिद खान यांना फोन केला. मुख्यमंत्र्यांनी त्यांच्याशी चर्चा केली आणि त्यांना सुरक्षा पुरवण्याचे आश्वासन दिले. सरकार त्यांच्यासोबत असल्याचे सांगितले. त्यानंतर साजिद खान यांना तातडीने Y श्रेणीतील सुरक्षा दिली.

आमदारांच्या सुरक्षेत वाढ

अकोला जिल्ह्यातील अजून एका आमदाराला पण धमकी मिळाल्याचे समोर येत आहे. पोलिसांनी याप्रकरणी तातडीने चक्र फिरवली आहे. या प्रकरणाची चौकशी आणि तपास सुरू केला आहे. तांत्रिक पुरावे सुद्धा गोळा केले जात आहे. तर हा फोन कुणी केला. त्याविषयीचे तांत्रिक पुरावे आणि तपासाचे काम सुरू झाले आहे. मुख्यमंत्र्यांच्या निर्देशानंतर आमदार साजिद खान पठाण यांच्या सुरक्षेत मोठी वाढ करण्यात आली आहे. त्यांच्या सुरक्षेसाठी 4 सशस्त्र पोलीस तैनात करण्यात आले आहेत. तर दोन आमदारांना धमकीचे फोन आल्यानंतर जिल्हा पोलीस अधिक्षक अर्चित चंद्रक यांनी वरिष्ठ पोलीस अधिकाऱ्यांची तातडीने बैठक घेतली. त्यांनी सुरक्षा आणि तपासाची माहिती घेतली.

आमदार साजिद खान पठाण यांची तक्रार नोंदवण्यात आली आहे. पोलीस तांत्रिक बाबींचा मागोवा घेत तपास करत आहे. धमकी नेमकी कुणी दिली आणि यामागे शुभम लोणकर आणि त्याच्या भावाचा काय हात आहे यादृष्टीनेही तपास सुरू आहे. राजस्थानसह इतर राज्यातील बिश्नोई गँगशी संबंधित तपास सुरू आहे.